بو باره‌ده دانیشماق بیر قدر تئزدیر. چونکی حاضرکی ایران رهبرلییی ایله بیزیم ائله جدی تماسلاریمیز اولماییب. حکومت عضولری آراسیندا معین تماسلار اولوب. اونلار داها چوخ اقتصادی و نقلیات مسئله‌لرینه عایید ایدی. او مسئله‌لر، هانسی کی، پرینسیپجه بیزده سیاسی گونده‌لیکدن آیری‌دیر و بیز هئچ واخت بونلاری قاریشدیرمامیشیق.

Axar.az خبر وئریر کی، بو سؤزلری پرزیدنت ایلهام علیئو یانوارین ۷-ده یئرلی تلویزییا کاناللارینا مصاحیبه‌سینده دئییب.

«اولکی حاکمیتله بیزیم مناسبتلریمیزین پیسلشمه‌سی یئنه ده بیزیم گناهیمیز اوجباتیندان اولماییب. ساده‌جه اولاراق، بعضی مقاملاری خاطرلاتماق ایستییرم. ایکینجی قاراباغ محاربه‌سی باشا چاتاندان، آرتیق بیز لاچین یولونا ویزوال مشاهده الده ائد‌ندن سونرا گؤرمه‌یه باشلادیق کی، ایران‌دان گلن یاناجاقداشییان یوک ماشینلاری منتظم اولاراق قاراباغا ارمنستان‌دان سفرلر ائدیرلر. من کؤمکچیمه گؤستریش وئردیم و او، ایرانین آذربایجان‌داکی او واختکی سفیری ایله تلفن‌لا دانیشیب و دئییب کی، بونو دایاندیرین. بیز بونو اجتیماعی‌لشدیرمک ایسته‌میریک، بیز خواهیش ائدیریک، بونو دایاندیرین. بو، یاخشی دئییل، بیز بونو گؤروروک، بو، بیزیم اراضی‌دیر. سیز بورادا قانون‌سوز ایشلرله مشغولسونوز. افسوسلار اولسون کی، بوندان سونرا بو، دایانمادی و داها دا آرتدی. اوندان سونرا ایکینجی آددیم اولاراق بیز ایران سفیرینی خاریجی ایشلر ناظرلیینه دعوت ائتدیک و اونا اعتراض نوتاسی وئریلدی و بونو اجتماعی‌لشدیردیک.

اوندان سونرا دا هم گولمه‌لی، هم ده آغلامالی حادثه‌لر باش وئردی. ساختا ارمنی ماشین نمره‌لرینی ایران یاناجاق داشییان یوک ماشینلارینین اوزرینه یاپیشدیرماقلا سانکی بو، ارمنستان ماشینلاریدیر. اما اونلارین اوزرینده فارسجا یازیلار دا وار ایدی. بو، بیزی چوخ تعجب‌لندیردی. اؤزو ده بیز آراشدیرماغا باشلادیق. گؤردوک کی، عینی نمره بیر نئچه ماشینا یاپیشدیریلیر، یعنی، نمره عینی، ماشینلار فرق‌لی ایدی. یعنی، بو ساختاکارلیغی دا او قدر سلیقه‌سیز ائتمیشدیلر کی، آدام، واللاه، سؤز تاپا بیلمیر. اوندان سونرا بیز آرتیق بیر ماشینی ساخلادیق، سوروجولر ساخلانیلدی و بیز گؤردوک کی، اونلارین یول سندلرینده یازیلیب کی، ایستپاناکرت، ارمنستان. یعنی، بو، آچیق بیزیم اراضی بوتؤولویوموزه، سوورنلییمیزه حرمت‌سیزلیک ایدی.
اوندان سونرا بیزه قارشی او معلوم هده-قورخو آددیملاری، تعلیملر، بیاناتلار، هده‌لر باشلامیشدی. بیز ده آدکوات آددیملار آتدیق. بیزیم سرحدیمیزده اگر هر هانسی بیر تعلیم، حربی تعلیم کئچیریلیرسه، بیز ده آذربایجان-ایران سرحدینین بو طرفینده عینی‌سینی ائتدیک. یعنی، گؤستردیک کی، بیز هئچ کیمدن قورخموروق و حاقلی اولان طرف بیزیک. بو، عینی زمان‌دا، مطبوعاتدا همین او تحقیر کامپانییاسی ایله مشایعت اولونوردو. چونکی بو، گؤرونور، بعضی حاکم دایره‌لرین بئله ایش اصلوبودور. اصلینده، تحقیر گوجسوزلویون رمزیدیر. سن اگر نیه‌سه چاتا بیلمیرسنسه، - یعنی، من ادب‌سیز اولان اینسانلاری نظرده توتورام، - تحقیره کئچیرلر. یعنی، تحقیر ائد‌ن، اصلینده، اؤزونو تحقیر ائدیر. اوندان سونرا ایران طرفیندن مسئله‌نین تنظیمله‌نمه‌سی و سایر خبرلر گلدی»، - پرزیدنت بیلدیریب.