مجارستانین پایتختی بوداپست‌ده ایران اسلام انقلابی کئشیک‌چیلری کورپوسو (سپاه) و ایران اسلام رسپوبلیکاسی کشفیات ناظرلیینین فعالیتینه حصر اولونموش "ترانس ملی تروریزمه قارشی مبارزه فورومو"نون بئشینجی اجلاسی کئچیریلیب.

Axar.az خبر وئریر کی، اجلاس ۱۴-۱۵ آپرل تاریخلرینده کئچیریلسه ده، آمریکا دولت دپارتامنتی آپرلین ۲۰-ده بو باره‌ده بیانات یاییب.

اجلاس یاخین شرق، آوروپا، آفریکا، آسیا و آمریکا دا داخل اولماقلا دنیانین مختلف بؤلگه‌لریندن ۳۵ اؤلکه‌نین اشتراکی ایله کئچیریلیب و مقصدی اسلام رسپوبلیکاسی و اونون تمثیلچیلرینین ترور فعالیتلرینه قارشی مبارزه اولوب.

بیانات‌دا بیلدیریلیر کی، بو ۳۵ اؤلکه‌دن سیاستچیلر و حقوق-محافظه قوه‌لری همرای‌لیک افاده ائتمک و ایرانین و اونونلا علاقه‌لی گروپلارین و طرفداشلارین ترور فعالیتلرینه قارشی موبارزه آپارماق اوچون تدبیرلر گؤرمک نیتیله بیر آرایا گلیبلر.

بیاناتا گؤره، اجلاس‌دا اشتراک ائد‌ن رسمیلر و حقوق-محافظه قوه‌لری دنیانین مختلف یئرلرینده باش وئره‌ن سون هجوملاردا انقلاب کئشیکچیلری کورپوسونون و کشفیات ناظرلیینین، ائلجه ده اونلارین علاقه‌لی شبکه‌لرینین یئنی متودلاری و تاکتیکالارینی مذاکره ائدیبلر.

اشتراکچیلار همچینین بو تهدیدلره قارشی "داواملی ساییقلیغین" واجیبلیینی وورغولاییب و موافق شخصلرین سیاحتلرینین محدودلاشدیریلماسی، جدی ویزا یوخلامالارینین آپاریلماسی، محکمه تعقیبی و سانکسیالارین تطبیقی و ترور حاللارینین معین ائدیلمه‌سی داخل اولماقلا، اونلارا قارشی مبارزه ایستراتگییالاری باره‌ده فکر مبادیله‌سی آپاریبلار.

گؤروشه آمریکا دولت دپارتامنتینین تروریزمله مبارزه اداره‌سینین یوکسک وظیفه‌لی رسمی‌سی مونیکا جیکوبسون صدرلیک ائدیب.

قید ائدک کی، ترانس ملی تروریزم فورومو ۲۰۱۹-جو ایلده "اسلام رسپوبلیکاسی ایله علاقه‌لی ترور فعالیتلری و ترانس ملی جنایتلر" باره‌ده گلوبال کوردیناسییانی و معلوماتلی‌لیغی آرتیرماق مقصدی ایله یارادیلیب.