اردبیل ویلایتی‌نین تاخیل ایستحصالیندا ۲۰ – ۳۰ فایز آزالما اولاجاغی گؤزلنیلیر.

آذنیوز. تی وی ایسنا خبر آگئنتلیینه ایستینادا خبر وئریر کی، بو سؤزلری اردبیل ویلایتی کند تصروفاتی تشکیلاتی‌نین رئیسی خلیل نیکشاد دئییب.

«اردبیل دوزون‌ده آپرئل آیی‌نین سونونا قدر سویوق هاوا شرایطی‌نین حؤکم سورمه‌سی، دیگر طرف‌دن ایسه ویلایتین موغان بؤلگه‌سین‌ده ایستی کولکلرین اسمه‌سی و بعضی دیگر ایقلیم دییشیک‌لیکلرینین تأثیری نتیجه‌سین‌ده بو ایل تاخیل ایستحصالیندا کئچه‌ن ایل ایله موقاییسه‌ده آزالما موشاهیده اولونور. موغان بؤلگه‌سین‌ده آرتیق تاخیل بیچیمی سونا چاتیب. بوغدا آلما مرکزلری ۲۴ ساعت فعالیت گؤستره‌رک بوغدالاری آلیرلار. ایندییه قدر فرمئرلردن ۱۵۳ ۰۰۰ تون بوغدا ساتین آلینیب، ویلایتین جنوب حیسه‌سین‌ده بیچیم باشلاماق اوزره‌دیر. ایستحصال ائتدیی بوغدانی دؤولته ساتماق‌دان ایمتینا ائدیب ساخلاماق ایسته‌یه‌ن فرمئر ساخلانج آنباری حاق‌دا معلوماتی صنایع، معدن و تیجارت ناظیرلیینین سایتین‌دا قئید ائتمه‌لی‌دیر. عکس تقدیرده آشکار اولونارسا قاچاقمال‌چی‌لیق یولو ایله الده ائدیلمیش مال حساب ائدیله‌جک. بازارین نیظاملاماسی آدمینیستراسییاسی قرارینا ایستینادا ویلایت‌دن بوغدانین چیخیشینا قاداغا قویولوب و ایجازه‌سیز بوغ‌دانین داشینماسی‌نین قارشی‌سی آلیناجاق»، – دئیه خلیل نیکشاد بیلدیریب.

قئید ائدک کی، اردبیل ویلایتین‌ده جاری ایلده یاز آیلارین‌دا چوخ سویوق هاوالار حؤکم سوردو. بول یاغینتیلار تاخیل ایستحصالینا اؤز منفی تأثیر گؤستردی. دیگر طرف‌دن ایسه کئچمیش‌ده اؤلکه‌نین تاخیل ایستحصالیندا هل ائدیجی رول اوینایان موغان دوزون‌ده اکین ساحه‌لری اکثر حاللاردا داها گلیرلی محصوللار اوچون نظرده توتولوب. همچینین، جاری ایلده هاوا شرایطی ایله باغلی فئرمئرلر گؤزله‌نیله‌ن محصولو گؤتورمه‌یه نایل اولماییب. مسئول شخصین سؤزون‌دن بئله چیخیر کی، قئیدیات‌دان کئچمه‌یه‌ن ساخلانجلاردا آشکار اولونان بوغدا قاچاقمال حساب ائدیله‌جک. لاکین قئیدیات‌دان کئچمک اوچون لازی‌می شرایطی اولان آنبار دا دئمک اولار مؤوجود دئییل. قیساجا دئسک، فئرمئرلر یا بوغدانی دؤولته ساتمالیدیرلار، یا دا اؤز محصوللارینی قاچاقمال‌چی‌لیق یولو ایله الده ائتمیش حساب ائدیله‌جکلر.