آمریکانین قانون دیشی فعالیت‌لری‌ قارشی‌سیندا ایسوئچره ائتکیلی رول اوینایا بیلر جمهور باشقانی دئدی:

آمریکانین ایرانا قارشی قانون دیشی و غیر اینسانی تحریم‌لری‌نین آرتماسینا تانیق اولدوغوموز بو حساس دورومدا، ایسوئچره‌دن داها ائتکیلی بیر رول اویناماسینی اوموروق.

حجت الاسلام والمسلمین حسن روحانی، سه‌شنبه گونو، ایسوئچره جمهور باشقانی ایله تئلفون باغلانتی‌سیندا دئدی، ایسوئچره خالقی هر زامان ایران جماعاتی‌نین گؤزونده سایغین میللت‌دیر. او آرتیردی: بوتون اؤلکه‌لرین کورونا ویروسو یایقینی ایله قارشیلاشدیغی بو چتین و حساس قوشول‌لاردا، آمریکانین قانون دیشی یاپدیریم‌لاری (تحریم‌لری) و اقتصادی باسینج، جماعاتیمیزا داها چتین شرایط یارادیب. روحانی ایسوئچره‌نین مالی مئکانیزم یولا سالدیغینی ممنونیت‌له قارشیلاییب، بو مالی مئکانیزمین داها دا ایشلک اولماسینی وورغولادی. او آرتیردی: بو مئکانیزمین یارادیلماسی حال‌حاضیرداکی قوشول‌لاردا (شرایط‌ده) ائتکیله‌ییجی اولا بیلر. بیز، بو مئکانیزمین داها دا فعال اولماسی‌یله، ایران‌ین بعضی اؤلکه‌لرده‌کی بیر پارا مالی قایناق‌لاری‌نین بو مسیردن عملی اولماسینی اومید ائدیریک.

جمهور باشقانی برجام‌ین بیر اولوسلاراراسی آنلاشما کیمی قورونماسی‌نین اهمیتینه اشاره ائدیب، دئدی: گرکلی‌دیر کی، اوروپا بیرلییی، اؤزل‌لیکله ده اوچ اوروپا اؤلکه‌سی، برجامین قورونماسی اوچون، برجام آنلاشماسی‌نین اویغولاماسیندا دنگه یاراتماق اوچون لازیم اولان ایش‌لری یئرینه گتیرسینلر. برجام‌ین تمل‌لرینی مؤحکم‌لندیرمک اوچون، ایسوئچره ده یاردیمچی اولا بیلر.

روحانی آرتیردی: ایسوئچره ایله اقتصاد، بیلیم و ساغلیق آلان‌لاریندا ایلیشکی‌لریمیزی گلیشدیریب، درین‌لشدیرمه‌یه کامیل حاضیریق. ایکی اؤلکه‌نین باریش، استقرار و اینسان سئورلیک یولوندا چابالاری‌نین داوام‌لی اولماسینی اومید ائدیریک.

ایسوئچره جمهور باشقانی: برجامی قوروماق اوچون بوتون تلاشیمی ائده‌جه‌یم.

ایسوئچره جمهور باشقانی فیطر بایرامینی ایران میللتی و حکومتینه تبریک دئییب، ایران ایله اؤلکه‌سی‌نین ایلیشکی‌لری‌نین گلیشمه‌سینه وورغولادی.

او ایکی اؤلکه‌نین کورونا ویروس لا مجادیله ساحه‌سینده تجروبه‌لری‌نین مئیدانا قویولماسیندان، و ایکی اؤلکه‌نین ساغلیق باخان‌لیغی‌نین ایش‌بیرلییی آپاراسیندان استقبال ائله‌دی.

خانم "سیمونتا سوماروگا"دئدی، ایسوئچره مالی مئکانیز‌مین ایران اوچون داها آرتیق قوللانیملی اولماسی اوچون الیندن گله نی ائده‌جک. او آرتیردی، ایرانین کووید 19 خسته‌لییی ایله مجادیله اوچون اولوسلاراراسی پول صاندیغیندان ایسته‌دییی اعتیبار ایسه بو مئکانیزم یولویلا علمه کئچه بیلر.

ایسوئچره جمهور باشقانی آمریکانین برجام‌دان چیخماسینا تاسوف ائتمه‌سینه اشاره ائدیب، دئدی: برجامی قوروماق اوچون بوتون تلاشیمیزی ائده‌جه‌ییک و باشقا اوروپالی طرف‌لری ده بو ایش اوچون و آنلاشمالارینا عمل ائتمه‌یه قورشالایاجاغیق.