نقده شهرینین اورمییا طرفین‌دن گیریشین‌ده قویولان نقده لؤحه‌سی شهر ساکینلرینین اعتراضینا باخمایاراق گؤتورولور.

آخار. آذ خبر وئریر کی، بو باره‌ده گونئی آذربایجان‌لی میللی فعال معلومات وئریب.

بیلدیریلیب کی، والینین گؤستریشی ایله لؤحه‌نین ییغیشدیریلماسینا سبب اورک سوونیرینین ایچری‌سینده شهرین قدیم آدینین (سولدوز) یئر آلماسی‌دیر:

«گؤردویونوز کیمی، یازی‌لی لؤحه‌ده اورک سیمگه‌سینین ایچین‌ده «سولدوز» یازیلیب. لوحه بلدییه و شورا طرفین‌دن رامین عباسنژاد آدلی قرافیسته حاضیرلادیلیب. آردینجا دونن سولدوزون (نقده) اورمییا طرف‌دن گیریشینه یئرلشدیریلیب. یئرلشدیریلدیکدن سونرا اوریین ایچین‌ده "سولدوز" کلمه‌سینی گؤره‌ن شورایی-تامین (شهرده دییشیک‌لیکلرله باغلی قرار وئره‌ن قوروم‌دور. عضولری شهرین والیسی، پروکورورو، بلدییه صدری، سپاه باش‌چی‌سی و پلیس رئیسی‌دیر) بیلدیردی کی، لؤحه گؤتورولمه‌لی‌دیر. یعنی سؤزوگئدن کلمه سیلینمه‌لی‌دیر. بو امری ایلک اولاراق قورومون هئیتین‌ده یئر آلان والی دئدی. بیلدیردی کی، بیز «سولدوز» سؤزونو دئمه‌میشیک، قرافیستین اؤزونون آرتیرماسی‌دیر. والی سونرا بو قراری شورانین اوزرینه آتاراق، شورایی-تامینین لؤحه‌نین ییغیشدیریلماسینی طلب ائتدیینی بیلدیردی. بون‌دان سونرا شورا آچیقلاما یایاراق، نقده‌نین کئچمیش آدینین سولدوز اولدوغونو، ۵۳ ایل اؤنجه پهلوی رژیمی دؤورون‌ده نقده‌یه چئوریلدیینی، اما هله ده اکثریتین دیلین‌ده بو سؤزون قالدیغینی بیلدیریب. یعنی «هارالیسان» دئیه سورغو کئچیریلسه، ۱۰-دان ۸-ی "سولدوزدانام" دئیر، نقده یوخ».

آکتیویست لؤحه‌دن شهرین قدیم آدینین سیلینمه‌سینه «آذریها» سایتینین خصوصی سعی گؤستردیی دقت چکیب:

«بونونلا یاناشی، تورکلرین علیهینه فعالیت گؤستره‌ن «آذریها» سایتی و پانیرانیستلر «سولدوز» آدینین قوندارما اولدوغونو و پانتورکلر طرفین‌دن ایر‌لی سورولدویونو اساس گتیره‌رک، مسئوللاردان آدین لؤحه‌دن سیلینمه‌سینی ایسته‌ییبلر. ایندی مسئله بوراسین‌دادیر کی، بیزیم مسئوللارین - والی، بلدییه، شورایی-تعمینین "آذریها" سایتی ایله امکداش‌لیق‌دا مقصدی ندیر؟ «سولدوز» آدی قوندارمادیرسا، نیه بلدییه‌نین سایتین‌دا نقدنی آختاریشا وئر‌نده کئچمیش آدینین سولدوز اولدوغونا دقت چکیلیر؟ اگر قوندارما دئییل، رسمی آدی اولوبسا، بو آدین ایستیفاده‌سین‌دن سؤزوگئدن قوروملار نیه ناراحات اولورلار؟»

او، همچینین، سولدوز آدینین نقده‌یه چئوریلمه‌سین‌دن ده دانیشیب:

«او واخت سولدوز محالینی قاجار خانلیغینین ولیهدی عباس میرزه اؤزو اوچون آلیب. بو بؤلگه ولیهدین شخصی مولکو اولوب. قاراپاپاق خانی نقی خان بوزچلونون ولیعهده یاخشی‌لیغی کئچدیی اوچون محالین سندینی خانین آدینا رسمیلشدیریر. سند حاضردا دا مؤوجوددور. سندده محل "نقی ده" آدلانیر، یعنی بو شخصه وئردیم. بو سببله ده سندده آد ائلجه قالیر. اما ۱۹۶۷-جی ایلدک بؤلگه‌نین آدی «سولدوز» دئییلیب و یازیلیب. ۱۹۶۷-جی ایلده پهلویلر دؤنه‌مین‌ده بؤلگه‌نین آدی نقده اولاراق اعلان ائدیلیب».