ائل دیلینده قامیشلا (قمیش) باغلی ماراقلی افاده‌لر ایشلدیلیر: «قمیشینی چک!»، «بویونا قامیش اؤلچوم»، «هر ایشه بیر قمیش قویماق». نیه محض قمیش؟ قمیش کیمی عادی بیر بیتکینی بو قدر مهم ائد‌ن سبب نه ایدی؟

Kult.az «بئله یارانیب» روبریکاسیندا بو افاده‌لرین نئجه یارانماسینا آیدینلیق گتیریر:

قامیش هر یئرده چوخ راحت‌لیقلا بیتن، یابانی چؤل بیتکی‌سیدیر. اوندان حصیر، چتن، سبد، سوپورگه کیمی معیشت اشیالاری حاضیرلاناردی. بعضی بؤلگه‌لرده اونا قامیش، بعضی بؤلگه‌لرده ایسه قمیش دئییرلر.

اؤنجه «قمیشینی چک»دن باشلایاق. شرق اؤلکه‌لرین‌ده کاسیبلار امکانلاری چاتمادیغی اوچون قلیان چکیلن مکانلارا داخیل اولا بیلمزدیلر. اونا گؤره قلیانخانانین پنجره‌سیندن ایچرییه اوزون قامیش اوزادار، ایچرییه دولان توستونو جیرلرینه چکردیلر. بعضا قلیانخانانین قاپیسیندان ، پنجره‌سیندن او قدر چوخ قامیش اوزاداردیلار کی، ایچریده‌کی خدمت‌چیلرین حرکتینه مانع اولاردی. بونا گؤره تئز-تئز اوزلرینی چؤله توتوب «قمیشینی چک، ایشیمه مانع اولما» دئییب قیشقیراردیلار.

او واخت‌دان دا بیری باشقاسینین ایشینه مانع اولاندا «قمیشینی چک» افاده‌سی ایشلدیلمه‌یه باشلاییب.

«بویونا قامیش اؤلچمک» ایستیی قارغیشدیر. یعنی سن اؤلسه‌ن، بویونون اؤلچوسونو قامیشلا گؤتوروب کفه‌نینی کس‌سینلر، قبرینی قازسینلار دئمکدیر. مئییتین بوی اؤلچولرینی بعضی کندلریمیزده ایندی ده قامیشلا آلماق عنعنه‌سی یاشاییر. عادتن، اوزون قامیشلار قبیرقازانلار، کفن کسه‌نلر طرفیندن اؤلچو آلتی اولاراق ایستیفاده اولونوردو.

«هر ایشه بیر قمیش قویماق» عادتن میز قویماق، بیه‌نمه‌مک، قورولموش ایشی پوزماق آنلامیندا ایشلدیلیر. قدیملرده کیچیک قامیش پارچالاری هم سای چؤپو کیمی ایستیفاده اولونور، هم ده اونلاردان فیت دوزلدیردیلر. کیم‌سه قامیش پارچالاری ایله معین حده گلیب چاتاندا بیر قامیش آرتیق-اسکیک دوشردیسه، حاق-حساب ایتردی. اونا گؤره ده «قمیش قویما» دئییمی ایشلنردی. زامان ایچینده قامیشدان دوزه‌له‌ن فیتلر، توتکلر ده بو افادنی گوجلندیردی. «بیرینین ایشینه قمیش قویماق»، اونون خبرینی عالمه یایماق، ایشینی پوزماق، دیله-دیشه سالماقلا انگلله‌مک آنلامینی وئردی.