آمریکا فدرال آویاسیا آدمینیستراسیاسینین کئچمیش پودراتچی‌سی، ایران اصیل‌لی ۴۲ یاشلی ابوذر رحمتی ایران حکومتینین تهلوکه‌سیزلیک و کشفیات قوروملارینین خیرینه آگنتی‌لیک، آمریکایا قارشی فعالیت ائتدیینی اعتراف ائدیب.

Axar.az خبر وئریر کی، بو باره‌ده آمریکا عدلیه ناظرلییی معلومات یاییب.

عدلیه ناظرلیینین آپرلین ۱۶-دا یایدیغی بیاناتا گؤره، رحمتی ان آزی ۲۰۱۷-جی ایلین دکابریندان ۲۰۲۴-جو ایلین ایون آیینا قدر ایرانین دولت رسمیلری و کشفیات آگنتلری ایله علاقه ساخلاییب، آمریکادا سوء قصد تشکیل ائتمک اوچون اونلارلا بیرگه پلان قوروب.

بیلدیریلیب کی، ابوزر رحمتی ایران کشفیات اورگانلارینا اهمیت‌لی معلوماتلار اؤتورمک اوچون ساختا جو و یالان معلوماتلارلا پودراتچی قیسمینده آمریکادا ایشه گؤتورولمه‌یه نایل اولوب.

"ایران‌لی جاسوس ۲۰۱۷-جی ایلده ایران تهلوکه‌سیزلیک خدمتین‌ده ایشلمیش اوکسک روتبه‌لی مأمورلا علاقه‌یه گیردیکدن ۴ آی سونرا ایرانا سفر ائدیب.
اورادا ایران تهلوکه‌سیزلیک تشکیلاتی ایله امکداشلیق باره‌ده راضیلاشدیق‌دان سونرا آمریکایا قاییدیب، آمریکانین گونش انرژی‌سی صنایع‌سی ایله باغلی حساس معلوماتلاری الده ائدیب و ایران حکومتینین رسمی‌سینه چاتدیریب"،- عدلیه ناظرلیینین معلومات‌دا دئییلیر.

همچینین بیلدیریلیب کی، ابوذر رحمتی ۲۰۰۹-۲۰۱۰-جو ایللرده سپاه-دا ظابط کیمی فعالیت گؤسترسه ده، آمریکایا مهاجرت ائتدیکده بو فاکتی گیزلدیب و علاقه‌دار دولت قوروملارینا معلومات وئرمه‌ییب.

آمریکاننین عدلیه ناظرلیینین معلوماتینا اساساً ابوذر رحمتی یئنی‌دن ایرانا سفر ائدیب و ۲۰۲۲-جی ایلین مای آیین‌دا آمریکایا گئری قاییتدیقدان سونرا اؤلکه‌نین گونش انرژی‌سی، گونش پانللری، آمریکا هوا لیمانلاری و آمریکا هوا حرکتینه نظارت قوله‌لری حاقین‌دا اطرافلی معلومات توپلاماغا باشلاییب.

او، ایران‌دا اولدوغو واخت قارداشینی دا بو ایشه جلب ائدیب و توپلادیغی معلوماتلاری اونون واسطه‌سیله ایرانین تهلوکه‌سیزلیک و کشفیات مأمورلارینا چاتدیریب.

محکمه ابوذر رحمتی باره‌سینده آوگوستون ۲۶-دا قرار وئره‌جک.

قانونا اساساً، اونو خاریجی حکومتین آگنتی کیمی فعالیته گؤره ماکزیموم ۱۰ ایل، سوءقصدده تشببوسه گؤره ایسه ۵ ایله قدر حبس جزاسی گؤزلییر.