ایکی قارداش ناغیلی واسطه‌سیله بالاجالار زحمت، باجاریق، عقلین اینسان اوچون نه درجه‌ده بؤیوک بیر اهمیته مالیک اولدوغونو آنلایاجاقلار. بو ناغیل مئساژ اولاراق اونو چاتدیرماق ایستییر کی، حیله‌گرلیکله، قول گوجو ایله هئچ نه قازانماق مومکون دئییل. و گؤزل بیر یاشامینین اولماسی اوچون تصادفلره دئییل، الینین زحمتینه، آلین ترینه بئل باغلاماق لازیمدیر.

بیر شهرده ایکی قونشو وار ایمیش، بیری تاجیر ایمیش، او بیری اکین‌چی. بونلارین هره‌سینین ایکی اوغلو وار ایمیش. تاجیرین اوغلانلاری هم فراستسیز، هم ده یامان دجل ایمیشلر. ائله ایشلری، پئشه‌لری اونا، بونا ساتاشماق ایمیش.

اما اکینچینین اوغلانلاری عقل‌لی، زحمتکئش، باشی آشاغی ایمیش. بو کیشینین بوتون وار-دؤولتی بیرجه جوت اؤکوزو وار ایمیش. کیشینین بؤیوک اوغلو ائولی ایمیش، کیچیی سوبای.

آی دولانیر، ایل کئچیر، کیشی جانینی اوغلانلارینا تاپشیریب اؤلور. آتالاری اؤلندن سونرا ایکی قارداش بیر مدت بیر یئرده دولانیرلار. اما بؤیوک قارداشین آروادی هئی ارینین باش-بئینینی آپاریب، گیلئی ائلییر:

– قارداشین بؤیویوب یئکه اوغلان اولوب. نه واختاجان بیزنه‌ن بیر یئرده قالاجاق. اونا ده کی، چیخیب گئتسین. اؤزونه آیری یئرده ائو-ائشیک دوزلتسین.

آرواد نه قدر دئییردیسه، اری قارداشیندان آیریلماق ایسته‌میردی.

اما آرواد ال چکمیردی کی، چکمیردی. آخیردا اری علاجسیز قالیب، کیچیک قارداشینا دئدی:

– قارداش، گؤروره‌م بو آرواد سنی یولا وئرمه‌یه‌جک، من‌ده عهده‌سیندن گله بیلمیرم. یاخشی‌سی بودو گل سنی آییریم، سنین ده جانین راحت اولسون. من ده اونون دانناغیندان قورتاریم. آرخایین اول، سنی آییرسام دا گؤزوم اوستونده اولاجاق.

کیچیک قارداش راضی اولدو. وار-یوخ آتالاریندان قالان ایکی اؤکوزلری وار ایدی. اونو دا بؤلوشدولر، هره‌سینه بیری دوشدو. قارداشلار بیر نئچه آی آیری یاشادیلار.

آی دولاندی، گون کئچدی، اکین اکمک واختی گلیب چاتدی. بؤیوک قارداش باخیب گؤردو بیر اؤکوزنه‌ن هئچ بیر ایش گؤره بیلمه‌یه‌جک. علاجی کسیلیب، گلدی کیچیک قارداشینین یانینا، دئدی:

– قارداش، ایندی اکین واختی گلیب، بیر اؤکوزنه‌ن نه سن ایش گؤره بیله‌جکسه‌ن، نه من، گل بیرلیکده اکیب، بئجه‌رک، نه گؤتورسک تن یاری بؤلریک. کیچیک قارداش راضی اولدو. همین گوندن ایکی قارداش آرپانی، بوغدانی اکیب، بیچیب دؤیدولر. هره‌سی اؤز پایینی تایا کیمی بیر یئرده ییغدیلار. ایسته‌دیلر ائوه داشیسینلار، گؤردولر قارانلیق دوشوب. هره اؤز تاخیلینین یانینداوزانیب یاتدی کی، سحر آچیلاندا ایشیق گؤزو دوروب، داشییاریق. بؤیوک قارداش یوخویا گئدننه‌ن بیر آز سونرا کیچیک قارداش دوروب، اؤز-اؤزونه برکدن دئدی:

– بو هئچ اینصافدان دئییل، بؤیوک قارداشیمین آروادی-اوشاغی وار. کولفتی بؤیوکدو، اما من تکجه‌یه‌م. تاخیلی دا تن یاری بؤلموشوک.
گرک من چوخ حیصه‌سینی بؤیوک قارداشیما وئریدیم.

داها اطراف‌لی ویدئودان ایزله‌یه بیلرسینیز...