شاعر-ژورنالیست آلما موغانلی ۱۹۹۰-جی ایلده تهران‌دا موغانلی عائله‌سین‌ده دوغولوب. اورتا تحصیلینی تهران‌دا آلیب. حاضردا تهران اونیوئرسیتئتین‌ده نووه فیزیکاسی ایختصاسی اوزره تحصیلینی داوام ائتدیریر.

اونون شعیرلری «یارپاق» قزئتی، «یاشماق» و «دیلماج» ژورناللاریندا درج اولونوب.
آلما خانیمین ۲۰۰۷-جی ایلده «بیچاقلانمیش هیوا» آدلی شیر توپلوسو یاییملانیب. او، شاعر راسیم قاراجانین «اؤلوم حاقیندا گونش» آدلی اثرینی اسکی الیفبایا چئویره‌رک درج ائتدیریب.

کولت. آز آلما موغانلینین «قیرمیزی رنگ» ائسسه سینی تقدیم ائدیر:

ایندی کی قیرمیزی رنگینی ایللر سونرا آچمیشام، آنلاییرام سؤزلرینی.

- قیرمیزی نه عشق رنگی‌دیر، نه ده حیات. قیرمیزی، ساده‌جه، قان رنگی‌دیر. قان رنگی...

نه بیلیردیم نه دئییر. من کی اونون قیرمیزی یاناقلارینا وورولموشدوم.

- یوخ، یوخ قیرمیزی جان رنگی‌دیر، - و یاناغینی چیمدیکلیردیم.

اؤزوم ده بیلمیرم نیه جهد ائلمیشه‌م بو یاریمچیق رسمی قورتارماغا. هاردان تاپیلدی، اونو دا بیلمیرم. اما بیلیرم کی، بو قوروموش قیرمیزی رنگه ساده‌جه تینر (آتئستون) قنیم‌دیر. قانا سو قنیم اولان کیمی...

- قانین او قدر قاتیلاشیب، بیر یئرده دایانیب سانکی، اونا گؤره‌دیر بو باش آغریلارین. هر شئی قانا باغلی‌دیر... هر شئی قیرمیزییا، - بونلاری دئیه-دئیه نار دنلیردی.

ایندی کیم‌دیر بو تینرین قاپاغین آچان؟ ایندی تینرین ایتی اییی بورنوما، سونرا جگریمه و بئینیمه دولاجاق و گونلرله باشی‌می گیجللن‌دیره‌جک.
- تینرین قوخوسو چوخ یاخشی‌دیر، سنین قانین قاتیلاشیب. گیله نار سویو ایچ. سانکی سویلا دورولانمیش قاندیر شوشه‌ده.

بو تینر ده یاغا بنزین سودور شوشه‌ده. آچمالییام آغزینی و بو قیرمیزی رنگی دورولتمالییام. یاناقلاری قیرمیزی اولماسایدی، بو باش آغریلاری دا گلمزدی، بیلیرم. هر نفس چکدییم‌ده جگریم گؤینییر و باشیم فیرلانیر.

- تینرین قوخوسو کیمی‌سه اؤلدورمه‌ییب، اما پولسوزلوق اؤلدورور. و پول رنگلردن چیخیر.

قیرمیزیدان قان سیچراییر ساده‌جه. قیرمیزینی نئجه الیمده توتمالییام - او دا یادیمدا دئییل.

- داریخدیم، دورماق ایستییرم.

- اما آز قالیر، بیر یاناق، بیر ده دوداق.

- اونلاری ازبردن چکمه‌لی‌سه‌ن. من لازیم دئییلم کی!

ازبرلر هارا گئدر، من نیه خاطیرلامیرام. من کی قیرمیزی وورغونو ایدیم، من کی یاناقلارینا...

بیر شئیلر گؤزومون قاباغینا گلیر، فیرچانی قیرمیزییا سالیرام - نیه دورولانمیر... نه قدر تینر تؤکسم ده، یئنه قاتیدیر بو رنگ.

- گیله نار سویو ایچ، قانین قاتیلانیب.

- باشیم آغریییر، تینئر آدامی اؤلدورر.

- یوخ، قانسیزلیق اؤلدورر، بیر ده قیرمیزی...

نفسیم آغیر گلیب-گئدیر. تینرین الیندن بیر ایش گلمیر، من اللریمی ایشه سالمالییام. بورالاردا بیچاق اولمالی ایدی، یا دا ایتی بیر شئی، نه بیلیم...

- سنین هر شئیین ایتسه ده، ایتیلر هر زامان الده اولور. قیرمیزی رنگینین سئوداسی هاردان گلیر؟

- یاناق... سنین نیه یاناقلارین...

- ایتی شئیلر هر زامان الده اولور. قیرمیزی ساده‌جه قان رنگی‌دیر.

تاپدیم پاسلانمیش بیر تیه‌نی. قیرمیزی رنگ نیه دورولانمیر؟

- نیه قاتیلاشیب قانیم؟ باشیم پارتلاییر.

- کیفیر (موردار) قانینی آلدیرمالی‌سان. بلکه دورولاشا قانین...

- منیم قانیمین بوتونو کیفیردیر.

قوللاریم آجیییر، اما باشیم یوخ. تینر اییی ده گلمیر. بیر آز... بیر آز سو اییی گلیر سانکی. یاناقلارینی خاطیرلاییرام. اوگونکو یاناقلارینی دئییل اما.

دوداقلاری... دوداقلاری اللریمه دولور. دوداقلاری آغارمیشدی، دئییردی: «ایتی شئیلری الده قویورسان. فیرچانی سالیرام اووجوما و چیزیرم...»

- دئمیشدیم، سنین بو قیرمیزی سئوگین ایش وئره‌جک الیمیزه، باخ نه قدر قیرمیزی رنگ دوزلتمیشم...

- اما یاناقلارین...

- یاناقلاریم یاییلیب...

من سون گوندن اؤنجکی گونکو یاناقلارینی خاطیرلاییرام...

فیرچانی سالیرام اووجوما.

قانیم قاتی دئییلمیش، باخ، باخ یاناقلارینا نئجه ده یاییلیر بو سئوگی...

قیرمیزی سئوگی رنگی‌دیر، قان رنگی‌دیر... قیرمیزی حیات رنگی‌دیر، اؤلوم رنگی...

باشیم آغریمیر، تینر ده آجیتمیر. ساده‌جه، ساده‌جه قیرمیزییا چالیر بیر آز بو دونیا...