معصومه جبارپور تبریزده دونیایا گلیب. آنا دیلیمیزده یازیب-اوخوماغی اؤز امگی سایه‌سین‌ده الده ائدیب. جبارپورون ایلک شعیرلر کیتابی فارس دیلین‌ده چیخیب. یازدیغی شعیر و یازیلارینی «معصوم» تخلوصو ایله ایمضالاییب.

کولت. آذ معصوم جابارپورون «دئمک آستانا دییشیلیر...» حکایه‌سینی تقدیم ائدیر:

کیشی اوتوراجاغین اوستون‌ده یئربه یئر اولوب، ساققالینی سیغاللاییب، ایکی الینی اوزونه قویاراق، دیرسکلرینی ماسانین اوستونه دایاییب، اؤنون‌ده اوتوران قیزین گولوشلرینی خاطیرلاییب، گؤزلویونون اوستون‌دن یئنی‌دن قیزا باخدی؛ سانکی دونیانین بوتون قایغیلاری قیزجیغازین گؤزلرینه چؤکموش‌دو؛ بیر کیچیک دینقیلتی گؤزلییردی کی، گؤزلری قان بولاغی اولسون…

باخیشینی سولا چئویریب قیزین یانین‌داکی اوتوراجاق‌داکی اوغلانا باخدی. گؤزلویونو اورتا بارماغی ایله اوسته ووروب قییقاج باخیشلارینی یئنی‌دن اوغلانا دیکدی. سانکی هئچ بیر شئی اؤنملی دئییل کیمی بیر گولوشله دوداقلاریندا گیزلنقاچ اویناییردی!

الین آرپا-بوغدا ساچلارینین اورتاسین‌دا گزدیریب، چاشقین-چاشقین ماسانین اوستون‌ده اولان بوشانماق قرارینا باخدی. قیرخ ایللیک عومرونو بو یولدا کئچیرمیشدی. بیر گون ایکی آیری اوره یی بیرلشدیریب، باشقا گون ایکی اوره یی آییرمیشدی… قیزین کیملیینی (شخصیت وثیقه سی) گؤتوروب ورقله‌دی. اوره یینه بیر سانجی تاخیلدی. ایکینجی دفعه بیر یووا داغیلیردی!

کیم‌لیگی بوکمه‌دن باشینی قالدیریب دئدی:

– ایسته ییرسینیز گئدین بیر آز داها دوشونون.

بیردن اوغلان سؤزون اورتاسینا:

– آغا، قورتارین منی بو محبوسلوق‌دان، ایسته میرم! اوخویون!

کیشینین سؤزو آغزین‌دا قورودو، اوتاغا یئنه سس‌سیزلیک چؤکدو. قیز سس‌سیز قارشی‌سین‌داکی دیوانا باخیردی؛ دیلینین آلتین‌دا نه ایسه میزیلدانیردی.

کیشی دؤنوب آرخاسینا باخدی، بیر گؤزل خط چئوره‌ده پارلاییردی: «گر جیلوه عشق اولسا، گتیرره‌م نئجه گلمز!..»

اوغلانا دئدی:

– بیر آزجا باییردا گؤزله یین، لطفاً!

اوغلان دئیینه-دئیینه آستاجا اوتاقدان چیخدی. کیشی دئدی:

– کاش کی، اؤزونه، حیات یولداشینا داها بیر شانس وئره‌سن، قیزیم!

قیز اوزاقلارا باخیردی، سانکی اکراندا بیر فیلمه باخیرمیش کیمی دونموشدو گؤزلری.

قیز دئدی:

– ایت ایتلییندن ال چکسه ده، سومسوکلویون‌دن ال چکه بیلمز. منیم کوچه-بازار قادینلاریندان نییم اسکیکدیر کی، گون‌ده بیر قادین یاتاغیما قوناق اولور؟! یاتاق اوتاغیمدا هر جور ساچ تئلی وار: ساری، قارا، قومرال… یازیق منیم پالید رنگلی ساچلاریم.

آغلاماق سسی اوتاغی بوغدو. اوغلان قاپینی آچیب ایچری بویلاندی. کیشی اوجا سسله دئدی:

– قاپینی اؤرتون!..

قیز چانتاسیندان بیر کاغیذ دسمال چیخاریب گؤزلریندن، بورنوندان آخان سویو سیلدی. یئنه دارماداغین دوشونجه‌لری ایله اوزاقلارا دالدی:

«مکتبین سونونجو زیلی سسلندی. قیزجیغاز تلسیک چانتاسینی چینینه آتیب، یولا دوشدو. سویوق یئل یاناقلارینا توخوندوقجا، سانکی یاناقلارین‌دا بیر جوت آلما جوجریردی! مکتب‌دن ائولرینه مسافه اون دقیقه‌دن چوخ اولمازدی. آچار سالیب قاپینی آچدی؛ بیر ماهنینی اوخویا-اوخویا آستانادا دایانیب، آیاققابیلارینی چیخاراراق باشماق رفینه قویدو. سونرا «آنا، آنا» چاغیراراق، پیلله‌لری بیر-بیر قالخیب، اوتاغین قاپی‌سینی آچدی. گؤزلری خالاسینا ساتاشاندا سئوینج هیچقیریغی اوتاقدا اوینادی! چانتا ایله بیرلیک‌ده خالاسینی باغرینا باسدی. سویوق یاناقلارینی خالاسینین یاناقلارینا سیخدی».

***

قاپی دؤیولدو. اوغلان یئنی‌دن باشینی ایچری سالیب دئدی:

– من تله سیرم.

– بیر آز داها گؤزله، سسله‌یه‌جه‌یه‌م.

قیز سس‌سیز آغلاییردی، گؤزوندن دامجی-دامجی یاش آخیردی. او، گؤز یاشلاری ایچین‌ده گولومسه‌ییب دئدی:

– ائشیتمیسینیز، قارغادان سوروشورلار کیمین گلینی‌سن؟ دئییر، «خالامین». ایکی ایل قان اوددوم، هر گئجه عمیم قیزینین عشقین‌دن دانیشدی، من یاتدیم سونوندا… آنام اوتوروب-دوروب خالامی، بیر ده اوغلونو قارغیییردی، اما منجه، گؤزل‌لیک زورلا اولماز! خالامین اوغلو سئودیینه قوووش‌دو، منیم سئوگیم ده اورییم‌ده باسدیریل‌دی. «بئله شئیلر فیلملرده، کیتابلاردا اولار»، - دئیردیم، اما من یاشادیم، یاشلاندیم. منجه، سئوگی اؤلموش‌دو. یئنه قاییتمیشدیم ایلک سایغیما؛ سئوگییه اینانمیردیم، اما بیر گون سئوگی تورو اوره یی حبس ائل‌دی. حیات بویالی گونلره دؤن‌دو، نیفرت کؤچوب، یئرینه سئوگی یئرلشدی. هر دفعه «پرئنسئس» سسلدیکجه اؤزومو دونیانین ملکی سانیردیم! هارادان بیلیدیم نئچه «پرئنسئس» یاشاییر اوریین‌ده؟!

قاپی یئنی‌دن دؤیول‌دو. قیز دؤنوب باخ‌دی، اما بو دفعه آچیلمادی.

«کئچمیش‌ده‌کیلر یاخشی دئییب، تاخت آلماق اولار، بخت آلماق اولماز! رحمتلیک بؤیوک آنام دا دئیردی: «آستانا دییشیلر، بخت ائله ایلک بخت‌دیر»، - دئدی.

قاپی دؤیولدو، اوغلان ایچری گلدی و اوتوراجاغین اوستون‌ده اوتوردو. کیشی نسه یازیردی...

بیر پاییز آخشامی کولک بوتون گوجو ایله قیزین اوزونه شیلله چکیردی. قیزین گوجو یئتمیردی کی، سارالمیش یاناقلارینی قیزاردیب پاییزدان اینتیقام آلسین... یارپاقلار ایسه سینیب تؤکوله‌ن بیر قیز کیمی تؤکولوردو.