کولت. آذ گونئی‌لی یازیچی جواد یئکانلینین «۷ یاشینداکی بیر قیزین مکتبه گئتمه‌سی» حکایه‌سینی تقدیم ائدیر:

مکتبین ایلک گونو اولدوغو اوچون هیجان ایچینده ایدیم. تانیمادیغیم اینسانلاری تانییاجاقدیم. آتاملا بیرلیک‌ده مکتبه ساری یولا دوشدوم، قالین چارغاتیم (باش اؤرتوسو) منی اینجیدیردی. مکتبه چاتدیم، مکتبین بؤیوکلویو و آب-هاواسی منی حیرتلندیردی. هیجانیم آرتمیشدی، هاوا دا چوخ ایستی ایدی.

باشیمدا اولان چارغات منی بوغوردو. سیرالار قورولدو و من سیرایا کئچدیم. دایانا بیلمه‌ییب چارغاتیمی باشیمدان آچدیم، اوجابوی بیغلی بیر کیشی گلدی:

- بورا خالانین ائوی دئییل، باشینی اؤرت.

- هاوا ایستی‌دیر، چارغات منی بوغور.

قیشقیراراق «باشینی اؤرت، عفریته»، - دئدی. اونون سسینه آتام یئتیشدی:

- نه اولوب؟!

- بو، سیزین قیزینیزدیر؟

- بلی... قیز، سن نیه باشینی آچیبسان؟

- آتا، هاوا ایستی‌دیر و من بوغولورام.

- باشین اؤرت، کؤپیین قیزی، بورا مکتبدیر.

- آتا، آخی...

سؤزومو بیتیرممیشدیم کی، آتامدان سیلله‌نی یئدیم. یئره دوشدوم، آتام دلی اولموشدو سانکی، قارنیما تپیکله ووروردو، هر تپیکده نفسیم کسیلیردی.

آتام وورا-وورا دئییردی:

- سنین دینین-ایمانین یوخدور؟! کؤپیین قیزی، یا اؤلجکسن، یا دا باشینی اؤرته‌جکسن.

اؤلومه یاخینلاشا-یاخینلاشا بیغلی کیشینی گؤردوم، گولومسییردی و قیافه‌سی گؤزومدن یاواش-یاواش گئدیردی، گؤزلریم یومولوردو.

گؤزومو آچاندا خسته خانادا ایدیم، آنام باشیمین اوستونده آغلاییردی. منی گؤروب اوزومو اؤپدو، «آه، قارابخت قیزیم» دئییب یئنیدن آغلادی. بدنیمین آغریسی منه گوج گلیردی، آغزیمی آچیب بیر سؤز دئمیه گوجوم یوخ ایدی.

بیر هفته ائوده قالدیم و یارالاریم ساغالدی. بیر هفته سونرا مکتبه گئتدیم. مکتبین ایلک گونو اؤیرندیم کی، باشیمی آچسام، اؤلجیم!