آنا صحیفه ادبیات |
کولت. آذ سحر بارانینین «کیمسهسیزلیکدن کئچیب آرتیق!» شعیرینی تقدیم ائدیر:
کیمسهسیزلیکدن کئچیب آرتیق!
آنلامیر ماساداکی کاکتوس اؤلوم ساچدیغینی اوتاغیمین قوجاغیندا
آنلاشیلمایان ندیر آنلامیرام!
دئییلمی قوش قووانلار قوشلارین گونوسودور؟
دئییلمی شعیر ده ساریلا بیلینمهین یارالار وار؟
عقربهلرین یادداشیندا
یالان یالقیزلیق قورخوسودور مثلاً
اؤلمهیه جسارت ائتمه دییمیز آنلار
قورخوروقسا قانادلانماسیندان کپنک لرین
هر شئی اولا بیلر دئییر بئینیمدهکی سورگون او سس لر
اوچماق گلیرسه ایچیندن آتلا
دیزلرینین ان اوجا قامتیندن
ییخیلماق اوچماغین قورخاق آدیدیر.
قورخما دئییر ایچیمدن آتلا
سای گئری سئودیک لرینی،
تاپشیر آدلارینی هاوادا اسن یالقیزلیغا
تاپشیر یئل قووانلارا اوفله اؤلومونون گؤزونه...
یوکسک قانادلاریندا قارانقوشلارین.
هر کسین ایچینده کؤچمک ایستهین قارانقوشلار وار.
اؤزونو قارانقوشلارا آدا
آپاراجاق سنی چیچک لرین گولدویو یئره،
بالیق قولاقلارینین اوچدوغو
اوچوروملارین یاشاما چاتدیغی قایالارا
عشق ده کلمهلردن عبارتدیر بوردا
عؤمور بویو گؤزلرینی یاوان یئیه بیلرم مثلا
سونرا ایسه اؤلوم
اوز دؤندره بیلمکدیر اللرینسیز
سسینسیز
قوجاغینسیز
جیسمیم بویدا بیر بویوتو ایشغال ائتمکدن
اؤلومونو یاشا!
تاریخ
2020.05.19 / 11:14
|
مولف
Axar.az
|