کولت. آذ گونیلی شاعر حبیب ساسانییانین (یاکاموز) زنداندا یازدیغی «آیریلیق» شعیرینی تقدیم ائدیر:

حسرت قالدی اوزوم سئویملی یارا
آیریلیق الیندن گلمیشم زارا
آیریلیق الیندن من قاچیم هارا؟
آیریلیق دردینی چکمه‌ین بیلمز
آیریلیق چکنین اوریی گولمز.

شیرین گولوشلرین یادیمدا قالیب.
آیریلیق قطاری بیزدن یول سالیب،
آغلیمی هوشومو باشیمدان آلیب
آیریلیق دردینی چکمه‌ین بیلمز
آیریلیق چکنین اوریی گولمز.

اؤتدو آیلار- ایللر، کؤنول تک قالدی
آیریلیق قلمین الینه آلدی
آییردی بیزلری دوستاغا سالدی
آیریلیق دردینی چکمه‌ین بیلمز
آیریلیق چکنین اوریی گولمز.

آیریلیق قوشونو توش گلسین اوخا

آیریلیق الین‌دن قورتاراق یاخا
قورخورام اؤلونجه یاندیریب یاخا

آیریلیق دردینی چکمه‌ین بیلمز
آیریلیق چکنین اوریی گولمز.

آیریلیق آختاریب بیزلری تاپدی
آیریلیق آتینی سینمده چاپدی
آغلادیب - آغلادیب، یاندیریب یاخدی
آیریلیق دردینی چکمه‌ین بیلمز
آیریلیق چکنین اوریی گولمز
آیریلیق غم توزون باشیما الر
آیریلیق اوزانسا ،عؤمور گوده‌لر
آیریلیق اوریی اوخ کیمی دلر
آیریلیق دردینی چکمه‌ین بیلمز
آیریلیق چکنین اوریی گولمز
نه اولا آیریلیق اولمایا ائلده
سارایین یئرینه بوغولا سئلده
وصالین شرابین توتایدیم
آیریلیق دردینی چکمه‌ین بیلمز
آیریلیق چکه‌نین اوریی گولمز
آیریلیق آییرا بیلمز بیزلری
کور اولا سونوندا اونون گؤزلری
سیلینیر آیریلیق بیر گون ایزلری
آیریلیق دردینی چکمه‌ین بیلمز
آیریلیق چکنین اوریی گولمز

تبریزین دوستاغی آیریلیق کانی
چوخلاری دله-دوز ، بابکی هانی؟
تن اورتادان بؤلدو آذربایجانی
آیریلیق دردینی چکمه‌ین بیلمز
آیریلیق چکنین اوریی گولمز.

دؤنمه‌سین آیریلیق چایی دنیزه
گؤروم آیریلیغی گلیدی گؤزه
یاکاموز بیر قوناق گلیدی سیزه
آیریلیق دردینی چکمه‌ین بیلمز
آیریلیق چکنین اوریی گولمز.