کولت. آز گونل عییواضلینین "آراخنا" آدلی شعرینی تقدیم ائدیر:

سویوق تبسم عکس اولونوب دوداقلاریندا،
سنین خوشبختلییه، سئوگییه احتیاجین وار، قادین.
سؤیله،
خریته‌لر اوزرینده دیلیملنه‌ن
مئریدیانلاری، پاراللری، (نصف النهارلاری و استوا لاری)
اؤلکه‌لر، اینسانلار آراسیندا
آیریلیق سالان سرحدلری،
قادینلارین قورخدوغو قوجالیق جیغیرلارینی
سن توخودونمو، آراخنا؟
بزمدینمی تور آدلی حیاتین،
تور آدلی منزیلین
اوزرینده تک-تنها آسیلماقدان؟
بئزمدینمی ایپک، تول دولاشیغی
همدم کیمی قوجماقدان؟

جسارتیم اولسایدی،
قوووشوق کؤرپوسو هؤر، منیم اوچون دئیردیم.
لاپ ائله او دونیانی بو دونیایلا بیرلش‌دیرن
سیرات کؤرپوسو کیمی.
قیطعه‌لری قوووشدوران
بوسفور کؤرپوسو کیمی.
بانپو کؤرپوسو کیمی.

دیلیمده ایلیشیب قالان
"سیم-سیم، آچیل" کلمه‌سینی
لعل-جواهیری اولمایان ماغارادا
قوووشدوغوم زامان اونوتماق ایستییرم.
باغلی قاپی آرخاسیندا سئوگی تاپماق ایستییرم.
خوشبخت اولماق ایستییرم.

آراخنا،
اؤزون کیمی بیر یووا هؤر
ایستی، سئوگی دولو بیر ائوین تاوانیندا.
گولوش سسلری گلن،
های-کویلو اوشاق باغچاسیندا.
و یا
یئنی یارپاقلایان بیر آغاجین کوغوشوندا.
برابر آسیلاق قوللاریمیزدان،
اونوداق هر شئیی
نغمه اوخویاق، شعیر یازاق، ناخیش توخویاق،
رسم چکک، ناغیللار اویدوراق،
آلداداق اؤزوموزو، آراخنا، آلداداق.

**********************

آراخنا آددیر