کولت. آذ رامیز رؤوشنین "کیم دییر، یوخودا اؤلمک آساندیر؟!" شعیرینی تقدیم ائدیر:

دئییرلر، یوخودا اؤلمک آساندیر.
اؤزون ده بیلمیرسن نئجه اؤلورسن.
سحر تئزدن اشیدیرسن اذاندی،
یوخوداجا کیریمیشجه اؤلورسن.

بیر گؤز قیرپیمیندا قورتولور جانین،
روحون بدنین‌دن اوچور قوش کیمی.
الین‌ده قالمیر دردین، درمانین،
درده ده سالمیرسان ائوده هئچ کیمی.
کیم دییر، یوخودا اؤلمک آساندیر؟!
کیم دییر، یوخودا اؤلمک آساندیر؟
کیم بیلیر، نئجدی یوخودا اؤلمک؟
بلکه ده، ان بؤیوک درددی، عذابدی،
ان پیس ایشگه‌نجه‌دی یوخودا اؤلمک.

بیر گؤز قیرپیمیندا یوخودا بلکه
ایللرجه بئلینده داش داشیییرسان.
نفسین کسیلیر آخیردا بلکه،
عمرونو داشلارا باغیشلاییرسان.

بیر گؤز قیرپیمیندا یوخودا بلکه
جللاد بالتاسییلا اوزولور باشین.
اوردا قیزیل قانین آخاندا بلکه
یاستیغا سوزولور اوردا گؤز یاشین.
کیم دئییر، یوخودا اؤلمک آساندیر؟!
یوخودا اؤلمکدی ان راحت اجل.
بو دا بیر یالانچی تسللی‌دیمی؟
گؤره‌سن یوخودا سنی بوغان ال
دوشمن الیدیمی، دوست الیمی؟!

ندی بیرجه آندا عمره سون قویان؟
بئینه آخیب، سیزان بیر داملا قاندی.
کیمدی قبرین اوسته ان برک آغلایان؟
بلکه ده، یوخودا سنی بوغاندی.

گئجه قورخو چؤکر یوخوموزا دا
ترپنر کیمینسه قارا کؤلگه‌سی.
بلکه هاسار چکک یوخوموزا دا،
هئچ کس یوخوموزا گیره بیلمه‌سین.
کیم دئییر، یوخودا اؤلمک آساندیر؟!
بلکه هئچ یاتمایاق-هر یاتانین دا
اگر اویانماماق قورخوسو وارسا.
بلکه هئچ یاتمایاق-عمرون سونوندا
اونسوز دا، بیر اجل یوخوسو وارسا.

اما یوخون گلیر-گؤرورم ائله،
داها یاواش-یاواش یومولور گؤزون.
یات... صاباح اویانماق اومیدی ایله.
یوخون شیرین اولسون - یات، عزیزیم!!