گؤز چاغینین سون گونلرینین سویوغون‌دا آغیز-بورنوندان چیخان ایستی نفس گؤزلویونون خیردا شوشه‌لرینی باغلادیب گؤرمه‌سینه مانع اولوردو.

گئجه‌دن دوشن شاختا یئری دوندورموشدو. هاوانین سازاغی یاغیشین تر یاناقلارین کسیردی.
یاغیش نه هاوانین شاختاسین ساییردی نه یئرین بوز باغلاماسینا اؤنم وئریردی. یئیین آددیملارلا کوچه‌نی باشی یوخاری گئتمکه‌ده ایدی.
تؤوشه‌یه-تؤوشه‌یه یولو قاباغینا قاتیب، دیل-دوداق آراسین‌دا اؤز-اؤزونه دانیشا-دانیشا گئدن بو گنج قادینین ۲۸-۲۹ یاشی اولاردی، آزاجیق دولو گؤوه‌ده‌سی اونون اورتا بویونا یاراشیردی.
شیشمیش گؤزلریندن آخان یاش، گؤزلرینه چکیلمیش سورمه‌نی اوزونه یاییب سورمه‌نین ایزی یاناقلارین‌دا باتمیش‌دی. دقتلی باخان‌دا هله ده سول یاناغیندا سورمه ایزینده گیزلنمیش اوچ کوبود بارماغین گؤیرمیش ایزی گؤرونوردو.
"یوخ دا اولماز گونده-گونده ساواشماق هارا کیمی آخی؟
بس منیم هاچان اوزوم گوله‌جک؟
معتاد(نارکامان) دئسن معتاددیر، ایشسیز دئسه‌ن ایشسیزدیر، نه دئسه‌ن اونناندیر. نئجه من ارده‌ن یاریمادیم نئجه؟ الله.
آخی بو کیم ایدی منیم بختیمه چیخدی.
سحردن گئجه‌یه کیمی بیلمیرم اوشاق ساخلاییم، ائو ایشینه باخیم، خالچا توخویوم، ائو خرجی چکیم، من‌دن پیسی، من‌دن قانمازی یوخ‌دو. گونوم ائله بو پیستیکلینین سیلله، تپیک، یومروغو آلتیندا کئچیر . داها هاچانا کیمی دایانیم آخی؟
داها بسیمدیر. هر نه اویون چیخارتسا بو دفعه ائوه قاییتمارام. زهله تؤکن گده‌نین آجی تیریک قوخوسو منیم ده اوست-باشیم‌دان گلیر گؤره‌ن اولسا ائله بیلر من‌ده نئچه لول چکمیشم."
بو سؤزلری دئیه-دئیه اؤزونو آتاسی ائوینین یاخینلیغینا چاتدیردی.
بیر آن اوشاقلیق گونلری گؤزلری اؤنونه گلدی. کوچه‌نین باشیندا بیر دیوارا سؤیکنیب آتاسی ائوینه باخدی. سوبایلیق گونلرینی اؤزلدی.
دریندن بیر آه چکه‌رک دوشونجه‌یه دالدی.
" گل ایندی آیاغینی قوی دده ائوینه، یئنه باشلایاجاق همیشکی سؤزلرینی دئیه‌جک: قیز ار ائوینه گلین پالتاری ایله گیریب کفه‌نله چیخار. آرازلا سئویشیب قاچماغیمی دا قاخینج ائد‌جک باشیما ائه ائه ائه...
ان آزی بو دفعه منی ائوه قویایدی، بئش-اون گون گئتمه‌سه‌م آرازین هوشو، باشینا گلر."
اؤزو، اؤز دئدیینه آجی گولومه‌سه‌ییب یئنه گؤزونو سود بویالی قاپییا زیلله‌یه‌رک دوشونجلرینین آردینی توتدو.
"ائه ائه ائه دئیه‌ن یوخ ایدی قیز قیچینی سیندیر اوتور ائوینده ده آخی ۱۸ یاشیندا قیز هارا- اره گئتمک سئوداسی هارا؟
ایندی دده‌م ائوینه گئتسه‌م بو دا سحری دانلاماغا باشلایاجاق، الله آخی من نئجه ائلییم؟ " دئییب ایچینه چالدی.
اوغلو آیاز اوچون هر شئیه قاتلانیردی یئنه ده اونو دوشونوب نارین آددیملارلا گلدیی یولو قاییتماغا باشلادی.
قاپینی یاواشجا آچیب ایچری گیردی. بورنوندا دانیشان اینسانلار کیمی بیر سس "هارا گئتمیشدین؟ " دئیه یاغیشی یئرینده دایاندیردی.
ساغ الینی آتیب باشیندا اؤرپیینی بیراز آرخایا چکرک، سول الی ایله بالاجا بیر نایلون دا اولان پئندیری سس گلن یئره ساری قالدیریب، بیر سؤز دئمه‌دن سفره‌نی آچماغا باشلادی.

فرخ جرایدی، یورغون