کولت. آذ آیخان آیوازین «کؤکهنین دادی» حکایهسینی تقدیم ائدیر.
ائله اوشویورم، او دا یوخدو کی،
گلیب اللرینی سره اوستومه.
سلام ساروان
کافه دن چیخهاچیخدا کؤهنه سئوگیلیمله قارشیلاشدیم. اول تانیمادیم، الینی هاوادا یئللهییب دووشان کیمی توللاناندا یاخینا گلدیم. قیوریم-قیوریم ساچی، گؤی گؤزلری ایلک گؤردویوم کیمی ایدی. اوزون، بویاقسیز دیرناقلاری، رنگارنگ کوفتاسی اونو آز-ماز دییشدیرمیشدی.
همنکی مهریبانلیقلا باخمیردی، ائله بیل، هانسیسا فیلمی چکمهیه حاضیرلاشان، بونون اوچون آکتیور آختاران رژیسسورلار کیمی جدی گؤرونوردو.
دوستوملا اونلارین ماساسیندا ایلشدیک. کؤهنه سئوگیلیم خوشبخت گؤرونوردو، اوزو گولوردو. هامی سوسموشدو. باشلارینی آشاغی سالیب تئلفونلا اویناییردیلار. قارشیمداکی کول قابینی الیمله فیرلادا-فیرلادا چیلچیراغا باخیردیم.
قیسا سوکوتدان سونرا کؤهنه سئوگیلیم مجلیسین آغ ساققالی کیمی بؤیور-باشینداکی ساققاللی اوغلانلاری تانیش ائله دی. او گون هانسیسا مترودا قیزین بیری ایله اؤپوشدویومو، اونو باغریما باسدیغیمی تئز-تلسیک، سؤزلرین قول-قابیرغاسینی قیرا-قیرا دانیشیر، آنجاق گولوشونو بوغا بیلمه دییندن احوالاتینی هئچ جور آخیرا چاتدیرا بیلمیردی.
بیر سیقارت یاندیریب منه گؤز ائله دی و اوغونوب گئتدی. توستونون آرخاسیندا گولمکدن گؤزلری یاشاران کؤهنه سئوگیلیم دؤشونون اوستونه دوشهن ساچینی آرخایا آتدی، چیپسی گؤتوروب یانینداکی اوغلانا اوزاتدی.
سس-کویدن ایستیفاده ائدیب دوستومون قولاغینا اییلدیم:
- کؤهنه سئوگیلیمدیر...
اوللر تئز-تئز کؤکه حاضرلاییب گتیریر، منه زورلا یئدیریردی. علی ایله شیرین کؤکهنی آغزیما تپیردی. اینجیمهسین، کوسمهسین دئیه چار-ناچار بیشیریب گتیردیی هر جور دادسیز-دوزسوز یئمکلری مدهمه اؤتوروردوم. بیلیردیم کی، چوخ یومشاق اوریی وار.
آغلینیزا گتیرمیین کی، بو قیزلا «سنی کیم آلاجاق؟»، «سن هله یئمک بیشیره بیلمیرسن» کیمی زارافاتلار ائتمک اولار. او، ازیزلنمیی سئویردی، پیشیک کیمی سیغالا گلیردی.
قاباغینا بیر باکال پیوه قویوب آرادا اودوملاییردی. بیر آز کؤکلمیشدی، بیر ده گئییمی دییشمیشدی: بئله داها گؤزل ایدی. منیم اونا باخماغا جسارتیم چاتمیردی. اوتانیرام؟ یوخ. بس ندیر؟ گؤزلری ایله قارشیلاشاندا سانکی اوزومه دئیجیی سؤزلری ایندیدن ازبر بیلیردیم: «سن هله ده بؤیومهمیسهن».
دوستومون داماغینداکی سیقارئتی یاندیریب اونا باخیرام. اوفیسیانت پیوه باکاللارینی گؤتورهنده قولاغینا اییلیب پیچیلداییرام:
- هه، دئمهلی…
ائولریندن چیخماق اوچون مین بیر بهانه آختاریردیق: کیتاب آلاجاغیق، قیز دوستو ایله تئاترا گئدهجکلر، تزه چیخان پالتارلارا باخاجاق.
اونو گؤزلدییم گونلرین بیرینده تئلئفونوما مئساژ گلیر:
«باغیشلا، ماما ائودهدیر. چیخا بیلمیرم». بیر یئرده اوخویوردوق، عینی اونیوئرسیتئتده. آلدیغیم قاییبلارین سببی ده اویدو.
- اوشاق کیمی دانیشیردی منله. بئله دئییردی، آیا، بونو دا یئ، بونو دا… نه گونلر ایدی…
بیر دفعه ایچکیلیدیم، زنگ ائلییب بیلمیرم، نه دئمیشهم، سحر مئساژی اوخویاندا توستو تپهمدن چیخدی: «سن پیسسهن. یئنه ایچمیسهن». زنگ ائلییب اوشاق کیمی کؤنلونو آلدیم، هله ماغازالارین بیریندن بالاجا آیی آلیب هدییه ائتدیم.
– چوخ ظلم وئردی، گئت-گله سالدی، اما آخیردا باریشدیق. اؤلوردو منیم دردیمدن… – کؤهنه سئوگیلیمین یانینداکی اوغلانلا اؤپوشدویونو گؤروب سؤزومو یاریدا کسدیم، پیوه باکالینی گؤتوروب باشیما چکدیم.
یانینداکی بیی تقدیم ائتدی: بو، منیم آشکیمدیر. بئلهجه ده دئدی: «بو منیم آشکیمدیر!»
اوغلان دا چوخ مدهنی ایدی، منه «اوردا اوتورما، بوردا اوتور» دئییر، داریخماماغیم اوچون آرادا گولمهلی نسه دانیشیردی. قارشیمداکی بوشالمیش پیوه باکالینا ایشاره ائدن اوفیسیانت خانیمی اونودوب کؤهنه سئوگیلیمین کیمینسه قاراسینجا دئیینیب، سونرا سؤیوشه کئچمیینه تاماشا ائدیردیم. بیر فیلم کیمی…
کافئده اوتوراندا حسابی برابر وئریردیک. دؤنری یاریبایاری یئدییمیز اولوب. بیر ده اوزون-اوزون تئلئفون دانیشیقلاری. چوخ واخت او دانیشیردی، من سوسوردوم. ائله بیل هانسیسا موغهننینین ایفاسینا قولاق آسیردیم.
– نئجه تانیش اولموسونوز؟ – دوستوم سوروشدو.
او گونو دومانلی خاتیرلاییرام. بلکه ده کؤهنه سئوگیلیم داها یاخشی بیلر. پارالئل اوخویوردوق، هر گون بیزیم قروپ اوتاغینا گلیردی. رفیقهسی ایله قاپینین آغزیندا صحبت ائده-ائده اوغرون-اوغرون منه باخیردی. بیر گون بیزیم قروپلا اونلارین قروپونو بیرلشدیردیلر.
– ریاضیات درسی ایدی. گؤرردین نتر هیاجانلییام. اوغلانلار بیر طرفدن، قیزلار بیر طرفدن تیرکالاییرلار کی، کاغیذا یاز، وئر اونا. اوژئ بوتون قروپ بیلیر ائ… سونرا معلم منی لؤوههیه چاغیردی. نسه مثال وئردی، ائلیه بیلمدیم. هامی گولدو، ائله پرت اولدوم کی… او دا قاباق پارتادا اوتورموشدو، گولوردو هئی.
درسدن چیخاندا اوغلانلار منی بیر قیراغا چکیب دئدیلر کی، یئکه اوغلانسان، جسارتین اولسون، قاباغینی کس دئ. قیزلار دا گلیب عقل وئردیلر. صبریم توکنمیشدی، قیز دا اونیوئرسیتئت قاپیسیندان چیخهاچیخدایدی.
- تئز ساخلادیم. آیتهن، سلام. گولدو، او دا سلام وئردی.
- دئدین؟
- هه. ائله پروموی دئدیم. دئدیم کی، ایستهمیرم باشقاسیندان ائشیدهسهن. من سنی سئویرم.
دوستوما سئوگی تاریخچهمیزی دانیشا-دانیشا هم ده بیر بهانه آختاریردیم کی، بوردان چیخیب گئدیم. آنجاق سبب تاپا بیلمیردیم. او، ائله هئی ایچیردی، سیقارئت چکیردی، سؤیوش سؤیوردو. اونا باخیردیم، خاطرهلر یادیما دوشوردو، باخمیردیم، منی صحبته چاغیریردی، دئییردی، نه کئفسیز دورموسان، دانیش گؤرک.
- نولدو سونرا؟
- هئچ، بیر-ایکی گون گئت، گل. بئزدیردیم کونکرئت. سونرا ائولرینه اؤتورمهیه باشلادیم. برابر آددیملاییردیق، قولوما گیردی. همیشه آتام دئییردی کی، قیزلار اوغلانلاری پوزور، اینانمیردیم. بلوکون آغزینا چاتاندا قارانلیق بیر کونجه چکدی منی. بدهنیم اود توتوب یانیردی، اورییم سینهمدن چیخیردی سانکی. منی اؤپدو، سونرا قاچدی.
اوفیسیانت گلیب ماسانی ییغیشدیراندا اورییم سیخیلدی. اوغلانلاردان بیری تکلیف ائتدی کی، اعتراف و جسارت اویونو اوینایاق. هامی بیر آغیزلا رازیلاشدی. ایلک گئدیشدن بوتولکانین بیر اوجو منه، او بیری ایسه کؤهنه سئوگیلیمه گلدی.
- جسارت، یوخسا اعتراف؟ – سوروشدو.
- اعتراف.
- همم… – خئیلی فیکیرلشدی. – ایلک دفعه کیمینله، نه واخت یاتمیسان؟
آچیغی، اوندان بئله بیر سوال گؤزلمدییم اوچون دوروخدوم. سونرا ایسه اوتاندیغیمی هیسس ائتدیرمهمک اوچون تئز-تلسیک جاواب وئردیم.
- ۹-جو صینیفده.
- کیمله؟ – گولدو.
- فاهیشیله. – هامی قاققیلدادی.
- نئجه؟ دانیش دا…
- نیی دانیشیم؟
- نئجه اولدونوز؟
- آدام کیمی…
گولدو، اویون تزهدن باشلادی، ماسایا پیوهلر گلدی.
اونونلا صحبت ائتدییم زامانلار یادیما دوشدو:
- باخ، گرک هر کسی اولدوغو کیمی قبول ائدسهن. آزاد اولماق لازیمدیر. بسدیر قاپالی یاشادین.
- نه دانیشیرسان ائ؟ او قیزلار وار ائ، آزاد دئدیین، هامیسی تربییهسیزین بیریدیر.
- ائله دئمه. هامینین اؤز شخصی حیاتی وار. قاریشما.
- آتا-آناسی قاریشیر دا. بوردا اولمور آزاد اولماق. باشا دوشورسهن؟ ایمکان وئرمیرلر… سن اوغلانسان، باشا دوشمزسهن. سیزه نه وار؟
هامی کئفلنمیشدی. کؤهنه سئوگیلیم قیریق وال کیمی نسه دانیشیردی. اونون رابطهسیز، یؤندهمسیز صحبتلرینه قولاق آسان دئییلدیم. جیبیمدهکی پوللاری ماسایا آتیب کافئدن چیخدیم، آردینجا دا دوستوم منه یئتیشدی.
- نیه آیریلمیشدینیز؟
- بیلمیرم.
دوغرودان یادیما دوشموردو. حقیقتهن، بیز نیه گؤره آیریلمیشدیق؟ هئچ بو حاقدا دوشونممیشدیم. بلکه ده بوتون آیریلانلار بئلدیرلر، سببینی بیلمیرلر. ائله سئوهنلر ده. کیمه سوروشورسان، عینی جاواب: بیلمیرم.
سویوق ایدی، تیتردییمی هیسس ائلدیم. بیر ده اونون بیر واختلار منه دئدیی سؤزلر یادیما دوشدو: «تویوموز اولاندا چوخ ایچمه ها».
آرخادان کیمسه منی سسلهدی. چؤنوب باخدیم: کؤهنه سئوگیلیم علینده گؤدکجهم گولومسییردی…