کولت. آذ آذربایجانلی گنج شاعر واسیف زؤهراب وغلونون "قادین..." آدلی شعرینی تقدیم ائدیر:

هر کس بیر طرفین‌دن اؤلمه‌یه باشلایار، عزیزیم؛

عالیملر آغلیندان،

رساملار گؤزلریندن،

شاعرلرسه اورییندن اؤلرلر.

اما ان گؤزل اؤلوم ده ائله اورییندن اؤلمکدیر.

ییخیلیب بیر قادینین آیاقلارینا،

اؤز اوریینین

اتیینده اؤلمکدیر.

هر کس بیر طرفیندن تنها قالار عزیزیم.

اعتراف ائتمیی باجارمایانلار غروروندان،

سئومیی بیلمه‌یه‌نلر دویغولاریندان،

یاخشی اینسانلارسا سئودیکلریندن تنهالاشار.

اما ان گؤزل تنهالیق یاخشی اینسانلارین تنهالیغیدیر.

داریخماقلاری دعا، دوشونمکلری تانری،

سوسماقلاریسا اورک قیرماقدان قورخمالاریدیر...

هر کس بیر طرفیندن سئویلر عزیزیم،

کیمی زنگینلییندن،

کیمی گؤزللییندن،

کیمی‌سه روحوندان.

اما ان گؤزل سئوگی روحوندان سئویلمکدی.

روحونلا بوتون مسافه‌لری قوشا بارماغینلا قایچیلاییب کئچرسن،

روحلار اوچون مسافه‌لر آنجاق اراضیلری بللی ائدر، قوووشمامازلیغی یوخ...

من ده سنی بئله سئومیشدیم روحومون قادینی...

سن کی بیر معجزه‌سن قادین.

سنینله تانرینین وار اولدوغونا دا اینانماق اولار،

سنینله تانرینین یولوندان آزماق دا.

سنینله ان گؤزل موسیقیلر ده بسته‌له‌مک اولار،

ان گؤزل شعیرلر یازماق دا.

ظریفلیین اینه‌نین گؤزوندن کئچرکن،،

بؤیوکلویون بیر دونیا داها دا اولسا سیغیشارمی؟

منی اورییمدن اؤلدوردون،

اوریینه ساغلیق عزیزیم...