کولت. آذ کیان خیاوین "سولمازلیق" شعرینی تقدیم ائدیر:

سولدوم من ، امما سن هله سولمازلیغینداسان
من تام پاییزلادیم،یئنه سن یازلیغینداسان.

چوخ موتلویام کی سن هله ده بیر چیچک کیمی
سولمازلیغینداسان،و سارالمازلیغینداسان.

من قانلی بیر تلاشدا سوسوب قالدیم امما سن
جوشغون انرژی ایله غزلبازلیغینداسان.

من یولچولارلا بیرگه آزان یورغون- آرغینام
سن جادده لر له بیرگه یورولمازلیغینداسان.

بیر ماهنیسان کی ائل سنی مندن سوراقلاشیر
آرتیق نه من سازام نه ده سن سازلیغینداسان.

ای عشق بیلمیرم سنه کیملر قان آغلاییب
بیر لیل سو تک گؤزومده دورولمازلیغینداسان.

دوشدونمو قانلی باتلاغا، ای اینجی! اینجیمه!
پارلاق قیزیللیغینداسان، آلمازلیغینداسان.

بیر داملاجیق شاراب کیمی هوپسام سنه ، نه غم
اولماز « دئدینمی اولدو ، دئدیم ، اولسون ، امما ، آ...ه !
هر شئ تولان زامان نیه اولمازلیغینداسان؟

گل منله بیر ایکیندی چاغی اوینا، گول ، دانیش!
بونجا یئتر منی یادا سالمازلیغینداسان.

سندن یاز ایسته ین یارالی بیر قوشام هله
بیلمم ندنسه قایدیما قالمازلیغینداسان.

درد لر گول آچدی گولله آچیلدی سینه مده ، آ....ه!
سن سه لو درد لره چارا قیلمازلیغینداسان.

قوی دوستاغین اولوم، منی بنده کمنده چک!
زنجیر کیمی اگر کی قیریلمازلیغینداسان.

قلبیمده مین باهار سارالیب ، سولدو سئوگیلیم
آنجاق داریخما سن هله سولمازلیغینداسان.