کولت. آز نریمان ناظیمین "قوربت" حکایه‌سینی تقدیم ائدیر:
غوربت

نهایت كيشي سينسيیير:

– یوخ، دئیه‌سن بو گئنه ده قویمایاجاق بيز یاتاخ … ائله … ائله …، ائلدار، اده آز دانيش آخي!

ائلي یوخودان سيچرایير. دورور یئرينده اوتورور، گؤزلرين اوووشدورور.

– گئنه ده یوخو گؤردون؟

ائلی جاواب وئرمه‌دن گؤزلرين ميلیونلار چيراغين ايشيغي ايله یانان نهنگ شهره زيلله‌یير.

یایين اوغلان چاغيدي. هوندور بير تيكينتي‌نين هله باشا چاتماميش مرتبه‌لرينين بيرينده یئرلشير قاليرلار. كيشي ده دورور اوتورور. بير پاپريز آليشديريب، سوروشور:

– دئمه‌دين نه یوخوسو گؤردون؟

– نه گؤره‌جه‌یم، هر گئجه گؤردویومو!- دئیه ائلي توما گئدير. قوزئی‌دن یوموشاق بير كولك اسير، قاپي- پنجره‌سيز ائوده دولاشير، اونون بویون- بوغازين اوخشایير.

– دئیيرم اژدر عمي، گؤره‌سن او گولدسته‌نين باشيندان بيزيم كنديميز گؤرسه‌نر؟

– او گولدسته دئیيل اوغول، اونا بورج دئیيرلر، گویا قيرخ تاباغا ايشله‌نه‌جك.

– یاخچي، اولسون، بورج اولسون، اونون باشيندان كند گؤرسه‌نر؟

– اوغلان هئش گؤر آغيلا سيغان‌دي، بوردان كنده یوز آغاج یولدو، بلكه ده چوخ!

ائلي سوسور، گؤزلري بورجا ديكيلي قالير.

قيزمار گونش شاخير. اوستا اژدر توخونموش آلماتورلاري سوتون‌لارين اوستونه یاراشديرير. ائلدارين اؤزو بوراداديرسا، باخيشي بورجون باشيندا گزير، الين ايشدن چكير سوروشور:

– دئیيرم اژدر عمي، گؤره‌سن، او بورجدا آلماتور ايشي ده وار؟

اوستا اژدر آجيیـير:

– هله سن بير دوغدوغونو بؤیوت، بورانين ايشين قورتاردين قالدي اورا؟ گون‌اورتا اولدو، بير ال دبرت آخي! گئنه نه اولدو، كوركووه بيره دوشدو؟!

ائلي بير سؤز دئمه‌دن ايشه قوشولور. آما بورجا چيخماق فيكيري ذهنين چولقالایـيبدير. دئمك، او اؤزونده دئیيل، بونا گؤره ده‌ هاچان قانادلانيب،‌هاچان بورجون باشينا قونماسيني اؤزو ده بيلمه‌یير: بویلانـير … بویلانير، تاپير … اؤزودو. نازليدي … حسن‌بولاغينين اوستونده‌كي گديكده دایانيب، كوزه چيینينده، اللريني گؤزونه كؤلگه‌ليك ائله‌یير. كند یولو اوزونو باخير … هه، اؤزودو، نازليدي، یاپبا یاپير، … اؤزودو، كرمه كسير، تؤوله چيخاردير، … اؤزودو حیط سوپورور، سشمه چالغي‌لایـير. اؤزودو … اؤزودو. ائلي كيمسه‌ني گؤرمور، هئچ نه ائشيتمير، یالنيز: «آماندي گؤ، گؤزله!!» سؤزونو ائشيدير، بير ده سون لحظه‌ده اوستا اژدرين وای سسيني…

ائلي بایغين دوشوب سایـيقلایـير: «ننه، … آی ننه، ننه، آی ننه، نازلي …یازيق، یازيق نازلي، نه اوچون اينجيديرسن … نازلي، نه اوچون، آنا دئیيلسن، بو قيزلاريوي گتيررم … قویمام، گليندي … كنيزدي … نازلي … آنا، منزيل توتارام، منزيل، منزيل … قویمام. آپارارام سني. تهرانا گه…».

گؤزلري آچيلير، یاخشي گؤره بيلمير و آلاجالانير. گاه بوز، گاهدان آغ گئیيمده گؤرونن بير قادين بيله‌یيندن یاپيشيب ساخلایـيبدي. باشي‎نين اوستوندن بير توربا آسلانيب، اژدر عمي‌ یانيندا دایانيبدير. قورویوب قایساقلانميش دوداقلاري ترپه‌شير، نه دئیه‌جه‌یي بللي اولمور.‌هاچاندان-‌هاچانا سسي آیدينلاشير: «اژدر عمي بورا‌هارادير، منه نه اولوب؟»

اوستا اژدر ائلي‌نين آلنينا تؤكولموش ساچيني بارماقلاريلا دارایـيب یئرينه قایتارير: «ائله بير شئی دئیيل، اوغلوم … ائله بير شئی دئیيل، نيگران اولما!

آغ گئیيملي قادين «شوكور آللاها، هوشا گلدي» دئیه الينده‌كي سورنگي، سوروم كيسه‌سينه بوشلادير، گئدير. ائلي یازيق- یازيق اوستا اژدره باخير، اوزون زاماندان سونرا سوروشور:

– بس قيشلاريم نيیه بو جور آغيردير؟

اوستا اژدر دئیير:

– گجه ساليبلار ….

ائلي گؤزلرين یومور، یئنه ده هوشدان گئدير.