کولت آذ گونئی‌لی شاعیر اومود زنگانلی‌نین شعرینی تقدیم ائدیر:

یئردن اوچوب گؤيه دورنا خياليم
سئير ائتمك ايسته يير آزربايجانى
زنگان ماحالیندان دوشوبدور يولا
سئير ائتمك ايسته يير آزربايجانى

آراز ساحيلينه قيزيل اؤزه ندن
سلاملار سؤيله يه كئچه دوزوندن
نور ساچیر سئوینجله دورنا گؤزوندن
سئیر ائتمک ایسته ییر آزربایجانی

قاراباغ عشقینه قانادین آچیب
گؤروش هاواسيلا هوسله اوچوب
كؤچری قوش کیمی کؤنولدن کؤچوب
سئیر ائتمک ایسته ییر آزربایجانی

تبریز, اردبیلی, اورمو, ماکینی
گنجه نی, شیروانی, گؤزه ل باكينى
گؤره كلبجرى, شوشا, شکینی
سئیر ائتمک ایسته ییر آزربایجانی

قوشولوب يازيلان گزیر دولانیر
يئردن گؤيه داغدان دوزه بويلانير
سرحدلر سينديران يئله تايلانير
سئير ائتمك ايسته يير آزربايجانى

ساوالان داغینا اوچور بولودلا
سئویر سهند داغین کؤکسونده اودلا
بوتایدان اوتایا کئچیر اومودلا
سئير ائتمك ايسته يير آزربايجانى