آنا صحیفه ادبیات |
کولت آذ گونئیلی شاعیر اوستاد آیریلمازین شعرینی تقدیم ائدیر:
عومور کئچیب قوجالمیشیق.
بیزدن نه ایستیرسن فلک ؟
الی قوینوندا قالمیشیق.
دؤیونتودن دوشوب اورک.
بیزدن نه ایستیرسن فلک ؟
تالان اولدو شانلی ائللر.
یاساق اولوب شیرین دیللر.
الیمیزدن دوتمور اللر .
نه دیر بو حوققا بو کلک.
بیزدن نه ایستیرسن فلک ؟
اویون گتدین باشیمیزا.
آغی قاتدین آشیمیزا.
باخمادین گؤز یاشیمیزا.
کدر وئردین اتک اتک.
بیزدن نه ایستیرسن فلک ؟
یار اولمادین آرزیلارا.
گؤزلر حسرت قالدی یارا.
دردیمیزه هانی چارا ؟
باشلار اوسته اوینور الک.
بیزدن نه ایستیرسن فلک ؟
تالان اولوب باغلاریمیز.
دومانلاشیب داغلاریمیز.
هانی او خوش چاغلاریمیز ؟
آیاقدان دوشموشوک تک تک.
بیزدن نه ایستیرسن فلک ؟
خزللشیب ائلین یازی.
کؤکدن دوشوب آشیق سازی.
دیلدن سالدین آیریلمازی.
هاچاناجاق فیکیر چکک؟
بیزدن نه ایستیرسن فلک؟
تاریخ
2020.04.15 / 16:18
|
مولف
آیتاج آراز
|