کولت آذ آرش احمدی‌نین شعرینی اوخوجولارینا تقدیم ائدیر:

آینانین قارشیندا دوروب_
اوُزومو آختاریرام...

گوُزلریمده پاییز آخشامی
ایسلاق خاطیره لر
باخیشلاریمدا بیر بوش یئر
سندن اوزاقلار...

دوداقلاریمدا قیرمیزی عوصیان لار
یاشیل اعتیراض لار...

دیشلریمین آراسیندا سیخدیغیم یارالار!

چئیین لریمن آرخاسیندان ایکی دورنا اوچوب گئدیر_
قولاقلاریمدا حزین بیر ماهنی
آنلیمدا یاشام آدلی بیر حیکایه نین آغریلاری...

ساچلاریمدا تنهالیق دان اوشودویوم بیر قیش گئجه سی
آق قارا ساچلار...

بئلیمده دوستلاریمدان قالان خیانت خنجرلری...

اللریم یالقیز
اللریم یازیق
کیمسه سیز...

قیچلاریم
یورغون
سونا چاتمیش یول
کوُلگه مین آرخاسیندا ییخیلمیش...

آه
بیلیرسن دوستوم
قلبیمی اونوتدوم
قلبیم
آرزولاریمین مزاری...