آنا صحیفه ادبیات |
Kult.az نورالدین ایسماییلین "اوستاد شهریاری دوشونورکهن" آدلی شعیرینی تقدیم ائدیر:
حیدربابا، کؤنلوم سنی سوراقلار،
اوستاد یازان داستانینی واراقلار،
یانار البت بیر ده سؤنهن چیراقلار،
اومیدیمیز قوی داشلارا دیمهسین،
میللتیمیز ظالما باش ایمهسین.
حیدربابا، باشین قانلی، قادالی،
غم توتوبدو، کؤکسون نئی تک صدالی،
نه دؤوراندی، ایشی دوشمن ادالی،
بیر باخان یوخ ظالم کسن باشلارا،
اورک دؤزمور گؤزدن آخان یاشلارا.
حیدربابا، گؤزون یولدا قالیبدی،
یارین ساغدا، یارین سولدا قالیبدی،
ندن سنین بختین دالدا قالیبدی،
بسدیر بئله سینهمیزی داغلادین،
غمی ییغیب سازدا تئله باغلادین.
حیدربابا، دونیا دؤنوب ترسینه،
آجیییبددیر، خمیریم گلمیر عرسینه،
چاغیر گلیم آیریلیغین درسینه،
قوللاریمی قوی دولاییم بوینونا،
سون قویاق بیز شر شیطان اوینونا.
حیدربابا، باشین دومان، چیسکیندی،
یولون، ایزین ائلسیز قالیب، کوسکوندو،
آشیق کؤنلوم درده طالب میسکیندی،
هاردان گلیب درد سینهنی داغلادی،
داغین، داشین هارای چکیب آغلادی.
حیدربابا، تورکو دئیهن دیلین وار،
بیر بیریندن آیری دوشن ائلین وار،
مگر ایندی اورمی آدلی گؤلون وار؟
دوشمهن گلیب سویوموزو قوروتدو،
گئج آییلدیق، گؤرهن گؤزو تور توتدو.
حیدربابا، سنین یاشین بیلینمز،
سئل باغلایان گؤز یاشلارین سیلینمز،
وطن بیردیر، مین ایل کئچسه بؤلونمز،
نامرد قوران قورغولاری ییخاق بیز،
آیریلیغین آخیرینا چیخاق بیز.
حیدربابا، زامان بیزی حاقلادی،
مشقه چکیب، صبریمیزله یوخلادی،
نه اولدوسا، ائله بیلدیک حاقلادیر،
نه بیلیدیک چرخی دؤنهن فلک وار،
قارشیمیزدا ظالم قوران کلک وار.
حیدربابا، دونیا بیزه سیناقدی،
یاری سئوگی، یاری مهنت، قیناقدی،
ظلمه دؤزمک باشدا سینان چاناقدی،
دؤیوش یوخسا قیلینج قیندان سییریلماز،
آج قارینلار آیران ایله دویرولماز.
حیدربابا، زیروهن دولو قار اولسون،
اوغلون، قیزین دایم سنین وار اولسون،
الله تورکه نجات وئرسین، یار اولسون،
آیدینلاشسین حاقا گئدن یولوموز،
بس دئییلمی ساغدان اولدو سولوموز؟
حیدربابا او تای، بو تای قارداشدی،
اؤولادلاری ازل گوندن یوردداشدی،
موروو داغیم دردده سنله سیرداشدی،
جان بدندن آیری نئجه دولانسین،
گؤروم دوشمن قارا گونه جالانسین.
حیدربابا، شهریاری نئیلدین،
دردلرینی کیمه آچیب سؤیلدین،
یاد اولموشدو، دوغما سسله هئیلدین،
دؤنوب گلدی چمهنینه، دوزونه،
نور الندی تبریزیمین گؤزونه.
تاریخ
2019.02.09 / 14:43
|
مولف
آینورا مممدووا
|