ادبی جمعیتیمیزده آدی چوخ حؤرمتله چکیلن مبارز شاعر «غلامرضا مجدفر» ۱۹۲۷ ینجی ایلده تبریزین دوه‌چی محله سینده دونیایا گؤز آچمیش و ۷۴ ایل یاشامیشدیر. بو اونودولماز شاعریمیز دوققوزونجو صنیفه قده‌ر تحصیل آلمیش و ادبیاتا قویدوغو ایلک ایل‌لرینی «عمر خیام نیشابوری»نین شعرلرینین آذربایجانجا ترجمه‌سی ایله باشلامیشدیر. مجدفرین ادبی اثرلری‌نین بؤیوک بیر قیسمینی ساتیریک اثرلر تشکیل ائدیر. او ادبی فعالیتیندن باشقا مبارز بیر شاعر اولوب؛ خصوصیله ایراندا گئدن نفت ملی‌لشمه سیاسی پروسسینده جدی اشتراک ائتمیش و بونون اوچون ده ۱۹۵۳ینجی ایلده باش وئرن آمریکایی کودتادان سونرا زندان و سورگونلره معروض قالمیشدیر. انقلابدان سونرا اثرلری اولدوز، آزادلیق، یولداش، وارلیق، دده قورقود و … بونلار کیمی‌غزئته‌لرده و اثرلرینین بیر سیراسینی احتوا ائدن «وجدان سسی» آدلی بیر شعر کتابیندا چاپ اولموشدور.

چوخ حؤرمته مالک آذربایجانین مبارز شاعری غلامرضا مجدفر ۲۰۰۱ینجی ایلین شهریور آییندا تهران شهرینده دونیایا گؤز یومموشدور. اونودولماسین- دئیه، خاطره‌سینی عزیز ساخلاماق اوچون اوستادین بیر شعرینی سیز عزیز اوخوجولارا تقدیم ائتدیک.

Kult.az گونئی‌لی شاعر غلامرضا مجدفراون شعرینی تقدیم ائدیر:

عاشیق- عاشیق چال سازینی، او سازی‌نین زخمه‌سی

اوره‌ییمین کهنه دردین تازالاییب، گؤینه‌دیر

خراب قالمیش وطنیمین تحریف اولموش تاریخی

خاطیریمده نقش باغلیر، قولاغیمدا دینله‌نیر.

عاشیق اوخو! ایگید سسین خاطیرلاییر کئچمیشی

قاچاق نبی، کوراوغلولار تازادان دوشور یادا

عاشیق اوخو! ساکت اولما! سسین دوشسون داغلارا

قوی سازیندان حالا گلسین داغ‌دا، داش‌دا، دریادا.

گئجه- گوندوز، ایستی- سویوق، یای- قیش دائیم چئوریلر

زامان دؤنر، دؤران کئچر، ائلدن آنجاق دیل قالار

جرس سسی قافله‌ده جومار درین سکوتا

کارواندان دوشرگه‌ده سؤنموش اولان کول قالار

عاشیق اوخو! قوی سیزلاسین بالابانین ناله‌سی

مظلوم خالقین فغانی‌له عجین اولوب قاریشسین

بلکه بو سس سبب اولا اتحادا، تیفاقا

بوتون ائللر بیر بیریله قوجاقلاشیب باریشسین

یئنه سنین سازین واردیر گوج گلیرسن سازینا

بوشالدیرسان، ایچریده دردین- غمین قالماسین

من دردیمی‌کیمه دئییم؟ منیم چاره‌م کیمده‌دیر؟

دیری گؤزلو دوروب باخیم، دردلی قلبیم پارتلاسین