من سئودیک‌لریمی
اوزوم سالخیمی کیمی
آغاجدان درمه‌یه آلیشمیشام.
باغچانیزدا دارآغاجی قالدیر سئوگیلیم،
هر سحر قارانلیق کؤچمه‌دن
یازدیغین مکتوب‌لاری آس،
گلیب دره‌جه‌یم.
دوستاغا بیر داها مکتوب گؤندرمه،
آچیب اوخویور قاضی‌لار!
سطیر- سطیر چوماق اولور او دویغولو یازی‌لار.
هله بوسؤزلری بوراخ، آخ سئوگیلیم آخ...
سندن بیر شکیل دیله‌میشدیم
سن شکیلین نئجه اولدوغونو سورموشدون،
اؤزون بیل، اما مندن سورسان
گؤزلرین دولماسین،
الینده چیچک اولماسین.
او قیوریم ساچلارینی
ایستر داغیت چیگین‌لرینه،
ایستر تؤک اوزونه،
ایستر هؤر.
اما چیچک‌لر آراسی بارداش قورما
اوتاقدا قولتوق اوسته اوتورما.
اینجیمه سئوگیلیم،
منیم گؤزلریم
سئودیک‌لریمی دمیر نرده‌لر آرخاسیندا گؤرور.
باس باغرینا نرده‌لری
گوله- گوله!
ابراهیم رشیدی