آنا صحیفه ادبیات |
کولت. آذ بیر آشیق بالاسی آشیق باهارعلی دن بیر احوالات تقدیم ائدیر:
نوروز بایرامی قاباخدادی، هامی اؤزونو بایراما حاضیرلاییر.آمما بخت آدامینان یولداش اولمایاندا، بایرامدا گلسه ائله بیل کی بیر بؤیوک درد گلیب آدامی تاپیر. آشیقلیغین بازاری کساددی آشیق باهاردا اوبیریسی آشیقلار کیمین ائوده اوتوروب بیر تویچو گؤزله ییر کی گلسین تویا آپارسین.بلکه بیر بئش اون تومن پول آلا بایرامی سووشدیرا.
بو گؤنلرین بیرینده قاپی چالینیب ،آچیلاندان سونرا معلوم اولوب کی بزازدی ،گلیب کی بیر آز بورج حسابیندان آلسین. مجبورا اونی یولا سالیب باشلاییب آرواددان سوروشماقا کی بو نه بورجودو؟
آرواددا دئییب کی:یادیندادی بئش آلتی گؤن بوندان قاباق آنامینان قارداشیم گلمیشدیلر؟
آشیق جواب وئریب کی:بلی، بو ایشین اونا نه ربطی واردی؟
آرواد دئییب کی: واردی نئجه یوخدو! اوگؤنو قارداشیم منه پای گئتیرمیشدی، اونا گؤره ده من بو بزازدان بیر چادیرالیق آلمیشام تا گئدنده ده ده م ائوینه بایراملاشماغا،سنین طرفیندن آناما پای وئرم.
آشیق ناچارلیغینان دئییب: آل آپار گؤره ک!
بو ایش، آشیغین احوالاتین پوزوب، اونو فکره سالیب. ائله بونا دوشونورکن، سینه سی جوشا گلیب،گؤروب بو دردی سازا دئمه سه اولمیاجاق.سازی آلیب سینه بئله دئییب:
ائولره سالیرسان تالان،
گلنده نوروز بایرامی!
اوشاقا ساتیرام یالان،
گلنده نوروز بایرامی!
دئدیم آرواد بو نه هایدی،
دئدی دوستان گلن پایدی،
دئدیم کاش قیچی سینایدی،
گلنده نوروز بایرامی!
نیسیه نی بول کسدیریر،
بزازلارا قول کسدیریر،
اسلحه سیز یول کسدیریر،
گلنده نوروز بایرامی!
نوروز گلسه گؤللر آچیر،
بوشلولارین رنگی قاچیر،
باشا بیر بؤیوک درد آچیر،
گلنده نوروز بایرامی!
بختی آغدی بنزیر قارا،
قولاق وئر آشیق باهارا،
بیلمیرم باخ قاچیم هارا
گلنده نوروز بایرامی!
تاریخ
2019.08.03 / 20:44
|
مولف
آینوره مممدووا
|