بو، ایران خالقینین سسینی عکس ائتدیریر - آبش
16:43
آنا صحیفه ادبیات |
کولت. آذ موسی یعقوبون "بو دونیانین قارا داشی گؤیرمز" آدلی شعیرینی تقدیم ائدیر:
لئیلکلرین چؤپ یوواسی بوش قالیب،
باهار گئدیب، پاییز گلیب، قیش قالیب.
گؤی چمنده اوجاق یانیب، داش قالیب،
بو دونیانین قارا داشی گؤیرمز.
نه او اوجاق کؤزرهسی، سؤنهسی،
نه او گونلر بیر ده گئری دؤنهسی…
غم ائلمه، کؤنلومون بیر دنهسی،
بو دونیانین قارا داشی گؤیرمز.
او گولیاناق بنددیر بیر خوش باخیشا،
کؤرپه بوداق ال آچیبدیر یاغیشا.
مین باهارین حرارتی ییغیشا،
بو دونیانین قارا داشی گؤیرمز.
اوت گؤیردیب او جیغیریم، او ایزیم،
توفانلانیب چالخالانماز دنیزیم.
داها مندن سئوگی اوما، عزیزیم،
بو دونیانین قارا داشی گؤیرمز.
آراز بویو چوخ معنالار سئزمیشهم،
ائله بیلمه اللریمی اوزموشم.
اورییمه داش باغلاییب دؤزموشم،
بو دونیانین قارا داشی گؤیرمز.
تاریخ
2019.08.05 / 15:02
|
مولف
آینورا مممدووا
|