گورجوستان یایلارقلارینین بیریندن آوقوست آی‌ین اورتالاریندا تیفلیسه طرف دمیر یول قاتاری یولا دوشمه‌یه حاضیرلاشیردی.گونون باتان زامانیدی،قاتار ناظیری یوشکوره‌ک آتدی،ماشین برک باغیراندان سونرا آستاجا یولا دوشدو.گئدنلر،سککیده قالانلارا قاتاردان اؤپوش-سالام گؤندریردیلر، قالانلاردا اونلارا دسمال قالخیزیب یئلله‌ییردیلر.

بو همیشه اولان ایش‌یدی،بونونلا ایشیم یوخدور.آمما یادیمدان چیخمایان احوالات همین ماشین یاواش-یاواش اوزاقلاشاندا، واقونلارین بیرینین قاپیسینین آغیزیندا ایکی کیشی اؤپوشن گؤردوم.بونلار بیر-بیرینی قوجاقلاییب خانیم کیمی اؤپوشوردولر.بیر قدر اؤپوشندن سونرا ایچری طرفده‌کی کیشی چؤله طرف دوران کیشی‌نین تک ألینده توتا-توتا او بیریسین چؤله طرف باسدی،دوشسون دئیه.

اودا جَلد تولاندی سککییه،تولاناندان سونرا قاتار ایله برابرا قاچماغا اوز قویدو گئنه قالخدی همن واقونا هابئله گئنه اورتاداکی کیشینی قوجاقلادی و اونلار گئنه اؤپوشمه‌یه باشلادیلار.

قاتارین حرکتی بیر آز سورعتلندی،آمما واقونا توللانان اوغلان اورداکی کیشینی اؤپمکدن أل گؤتورموردو أن اوزاق گئدندن سونرا پیشیک کیمی اؤزونو دالی-دالی توللاییب سیچیرادی دوشدو یئره، هله یئرده ده قاباغا طرف واقونداکی یولداشلاریندان اؤترو قاچدی، آنجاق آخیردا دایانیب،دایاناندان سونرا گئنه گؤزو اوزاقلاشان قدر قاتاردایدی.

جاماعتین ایچینده بیر نئچه گؤرجو یولداشلاردان خبر توتوب بیلدیم بونلار ایکی قارداشیمیشلر.بیری بیرآز اوزاق سفره گئدیر،اوبیری قارداشینی یولا سالیر.هله گئدن ماشینین قیشقیریغی چوخ اوزاقدان گلیردی آمما یولا سالان قارداش ائله دوروب قاباغا باخماقدایدی.بیر قارداش او بیری قارداشی بئله‌لیک‌له یولا سالیردی.

ماشین گئدندن سونرا واقزال بیردن سیره‌‌لدی.جاماعات بیردن داغیلیب هره اؤز ائوینه-ایشینه گئتدی.واقزالین قاباغینی بیرآز اؤنجه بوردا دوران قاتاردان بوشالندان سونرا،کور چایی‌نین کناریندا جرگه ایله بیتن اوجا أرر آغاجلاری گلدی دوردو گؤزومون قاباغیندا هاوادا بیرآز نسیم واریدی اونون اوچون‌ده بو آغاجلارین باشلاری گاه ساغا طرف أیریلیردی گاه سولا طرف.آمما ائله‌ده اولوردو:بیرینین باشی ساغا طرف أیلنده اورتالیغا بیر آیریسی داخیل اولوب اوبیری آغاج سول طرف أییردی.بئله اولاندا،ایکی آغاجین باشلاری گاه بیر-بیریندن اوزاقلاشیردی گاه بیر-بیرینه یاخینلاشیردی.

او اوزدن من،بوردا بیر غریب قوجا کیشینی،بئله خیالات آلیردی،بلکه بو أرَر آغاجلاری‌دا اینسانلار کیمی دویغو ییه‌سی‌دیلر.بلکه بونلاردا ایندی بایاقکی ایکی قارداش کیمی اؤپوشورلر..!
آغاجلارین اؤپوشمه‌یه ایله ایکی قارداش اؤپوشمه‌یی آراسیندا بیر بؤیوک فرق وار.فرق بودور:بورداکی أررلری بیر-بیریله یاخینلاشدیران قیراقدان گلن یئللردیلر،آمما قارداشلاری اؤپوشدورن قارشی محبَت‌دیر.بوردا من غمگین اولدوم،نه سببه غمگین اولدوم،بونو داها سؤیله‌مک ایسته‌میرم.