کولت. آذ شاهمار اکبرزادنین "اوتانیم یئرینه " آدلی شعیرینی تقدیم ائدیر:

اوتانیم یئرینه آی بولود سنین

آللاهین آلتیندا آغ ائیله ییرسن

آلیشیر جییگری چولون، چمنین

یاغیشی دنیزه سپه له ییرسن

اوتانیم یئرینه سنین آی دنیز

سوسوزلار قوینوندا یئتمیر کامینا

چایلارین باشین کسیب تر تمیز

دونموسن سولارین قبریستانینا

بوداکی مین ایللیک تورک قبریستانی

آنالار کور اولدو آغی دئمکدن

اوتانیم یئرینه تورک یاتاغانی

گوزلرین دویمادی تورکو یئمکدن؟

اوتانیم یئرینه میصری قیلینجیم

توفنگ چیخان کیمی قینینا گیردین

اوتانیب قیزاریر سنه گوونجیم

سن اوز قانیمیزا یئریکلییردین

اینانجیم گوونجیم قوچ کور اوغلو دین

دوشمنین کیم ایدی؟ حسن پاشایدی!

لئش بیریانا، باش بیریانا دئییردین

قالاغا ووردوغون، قارداش باشی ایدی

اوتانیم یئرینه امیر تیموریم

ازدین بایزیدی، قیردین تاتاری

سنین ظفرینله سیندی غروروم

یادلارا قول اولدو قورد بالالاری

شاه بابام ختایی، آی سلطان سلیم

چالدران دئینده اودلانیرام من

نئچه عصیردیرکی دوزلمیر بئلیم

سیزین یئرینیزه، اوتانیرام من

اوتانیم یئرینه،آی اینسان اوغلو

بیر یاندان اجل دن فریاد ائدیرسن

او بیری یاندان دا زیرهلی _زاغلی

اولوم سیلاحلاری ایجاد ائدیرسن!

بیر اوتانج قورومو قوراردیم حکما

اگر اولماسایدی منی قینییان

یئرلردن ،گویلردن اوتانیرام من

اوتانیم یئرینه، آی اوتانمایان