کولت. آذ علی‌آغا واحیدین "نه دئییم "آدلی غزلینی تقدیم ائدیر:

من او شوخه گولی-رعنا دئمییم، بس نه دئییم؟
عاشیقه بولبولو-شئیدا دئمییم، بس نه دئییم؟

مین گؤزل گؤرسه گؤزوم، بیر کره دویماز کؤنلوم،
بو کیچیک قطره‌یه دریا دئمییم، بس نه دئییم؟

من اگر عشقی‌ده مجنون دئییله‌م بس نچییه‌م؟
سئودییم دیلبره لیلا دئمییم، بس نه دئییم؟

چیرپینیر قوش کیمی هر زولفونو گؤردوکجه کؤنول،
من بو دیوانه‌یه روسوا دئمییم، بس نه دئییم؟

گؤزلرین حسرتینی چکمه‌یه‌ن عاشیق یوخ‌دور،
سنه من آفتی-دونیا دئمییم، بس نه دئییم؟

بو شیرین‌لیک، بو لطافت کی، سنین وار گؤزلیم!
سنه گول‌دن ده من اعلا دئمییم، بس نه دئییم؟

عشقی‌دن بیر بو قدر سؤیله‌مک اولماز واحید،
من بو مجنونلوغا سئودا دئمییم، بس نه دئییم؟