آنا صحیفه ادبیات |
«باکی - تهران» ریسی یولا دوشور. سرنیشینلردن خواهیش اولونور کی، طیارهیه مینسینلر – دئیه هاوا لیمانینداکی نماینده گؤزلهمه سالونونداکیلارا سسلندی.
قالان بیر نئچه نفر درحال طیارهیه دوغرو حرکته کئچدی. تکجه سکامیالارین بیرینده اوتوروب، هله اوخودوغو کیتابدان آیریلا بیلمهیهن آیخان قالمیشدی. بیر نئچه ثانییه ایچینده او دا کیتابین سئهریندن آیریلیب قالخماغا هازیرلاشان طیارهیه تلسدی. طیارهیه مینیب سالوندا اؤزونه یئر ائلدی. خوشبختلیکدن اونا پنجرهنین اؤنو دوشموشدو. سئوینهرک یئرینده اوتوران آیخان، طیاره قالخدیقجا پنجرهدن باخاراق، گونو-گوندن گؤزللشهن باکینین اسرارنگیز گؤرونتوسونه بیر داها تاماشا ائلدی. بیر آنلیق سانکی او اؤزونو بو «نازلی یار»-دان آیریلیر کیمی دوشوندو و جمعی بیر گونلویونه گئتمهسینه باخمایاراق، گؤزل باکی اوچون داریخماغا باشلادی. قفیلدن گؤزلری دولدو، اوریی سیخیلدی. طیاره بولودلار آراسیندا گؤرونمز اولدوقدا ایسه او «بیر داها باکینی گؤره بیلهجکمی» دئیه درین حزن یاشادی. هالبوکی هئچ ده بو جور دویغولارا قاپیلماغین یئری یوخ ایدی. بیر گون سونرا آیخان یئنیدن اؤز دوغما شهرینده اولا بیلهجکدی. اما باکیدا دوغولان، بؤیویهن، اؤزونه کاریئرا قوران ۳۰ یاشلی بو ائموسیونال جوان گؤرونور دوغرودان دا اؤز دوغما شهرینه محکم باغلانیبمیش. آخی زارافات دئییل دوز ۳۰ ایل اونون قوینوندا یاشامیش، سئوگیسینی، دردینی اونونلا - «جوشقون» ماوی خزرله، «قوجا» قیز قالاسییلا، درین سیرلره مالیک شیروان شاهلار سارای کومپلئکسیله و س. بؤلوشموش، آجیلی-شیرینلی گونلرینی اونونلا کئچیرمیشدی...
بئلهجه بیر گونلوک آیریلماسینا باخمایاراق آیخان دوغما باکینی اؤزلییردی آرتیق. اما اوریینی راحتلاداجاق بیر شئی ده واردی؛ حاقیندا کیتابلاردا اوخودوغو، تملینی اولو باباسی – آذربایجانین بؤیوک حکمداری آغا محمد شاه قاجارین قویدوغو، اؤز گؤزللیگی و گیزمیله نینکی ایراندا، بوتون شرقده دیللر ازبری اولان ازلی تورک یوردو – تهرانی گؤرمک آرزوسو، هیجانی اونا اینانیلماز درجهده خوش حسلر بخش ائتمیش، اونو یئنی ماراقلی دوشونجهلره وادار ائلمیشدی.
تهران حاضردا فارس حکومتینین پایتختی اولسا دا، یارانان آندان ایندییه قدر دایما تورکلرین یاشادیغی، اینکیشاف ائتدیردیی شهر اولموشدو. بورادا آذربایجانین دیگر تاریخی تورپاقلاری تبریزدن، اردبیلدن و باشقا شهرلردن نیسبتهن داها چوخ تورک یاشاماسینا باخمایاراق فارسلار دا آز دئییلدی. چونکی تهران ۲۰۰ ایلدهن آرتیق بیر زاماندا «ایران» آدلانان دؤولتین پایتختی اولموشدو. مس بونا گؤره ده شرقده اؤز شووینیستلیگی ایله تانینان فارسلار، تهران باشدا اولماقلا دیگر زنگین تورک شهرلرینی، ویلایتلرینی دایما اله کئچیرمهیه چالیشمیش، «جمعی-ایران»-آ صاحب اولماق اوچون بؤیوک پلانلار قورموشدولار. بو پلانلارین نتیجهسی اولاراق دا ۱۹۲۵-جی ایلده داخیلی سیاسی چکیشمهلردن ایستیفاده ائدرک «آغالاری» اینگیلیسلرین کمکیله حاکمیته گلدیلر. اوندان سونرا ازلی تورک یوردو تهران، بینلخالق عالمده فارس شهری کیمی تبلیغ ائدیلمهیه، «پایتاختی-فارسی» کیمی تانینماغا باشلادی..
داوامی وار
تاریخ
2020.04.26 / 10:58
|
مولف
ائلشن ایسماییل
|