آنا صحیفه ادبیات |
کولت. آذ شاعر قیسمت روستمووون دؤرد ایل اول قادین زوراکیلیغیندان بحث ائدن "اوچان بوشقابلار حاقیندا حقیقتلر" آدلی شعرینی تقدیم ائدیر:
گولمه، دوز دئییرم، شاهیدلریم وار،
گئجه قیرمیزییدی، دهشت قیرمیزی.
قونشو ائیوانیندان بیزیم ائیوانا،
بیر جوراب ائله بیل دیل چیخاریردی،
اوزاقدان شهره ایشیق یاغیردی...
آجی بیر سیقارئت اؤپوردوم یئنه،
بیر شئیرین یادینا دوشوردوم یئنه.
گئجه قیرمیزییدی، دهشت قیرمیزی.
قونشونون ائیوانی چیچکلمیشدی،
گئجه قیرمیزییدی، دهشت قیرمیزی...
ائیوانا چیخمیردی، اؤزوندن راضی!
گویا پالتار ییغسا، دونیا داغیلار.
من سونرا بیلدیم کی، بئلیمیش یازی،
اولمور اولار ائتمک اولار-اولمازی،
سئچکی قوتوسویدو ظالمین قیزی،
"اومید" توللاییردین، "حسرت" چیخیردی.
گولمه، دوز دئییرم، شاهیدلریم وار.
آتاسی ایچمیشدی، آسلان اولموشدو،
آناسی قانینا غلتان اولموشدو،
گئجه قیرمیزییدی، دهشت قیرمیزی.
اوزاقدان شهره ایشیق یاغیردی،
ایچیم سیقارئتدن پیس کؤزریردی.
بو بؤیوک دونیادا، بؤیوووک دونیادا،
تیترک اللریمی قویماقدان اؤترو،
یئر تاپا بیلمیردیم، تاپا بیلمیردیم...
گولمه، دوز دئییرم، شاهیدلریم وار.
آلنیمدا، اوزومده تر پوچور-پوچور،
من او گون ایناندیم بوشقابلار اوچور،
اوچور گئجه-گوندوز، هر آخشام-سحر...
اوچور گؤی اوزونده گئتدیی یولو -
چاشیب سهو سالاندا، ایتیرهنده ده.
اوچور، قادینلارین اوستونه اوچور -
لیمونو گویا گئج گتیرهنده ده.
گولمه، دوز دئییرم، شاهیدلریم وار،
گئجه قیرمیزییدی، دهشت قیرمیزی...
(۲۰۱۵)
تاریخ
2019.10.10 / 12:30
|
مولف
آیتاج آراز
|