آنا صحیفه ادبیات |
کولت. آذ آذربایجانلی شاعر سلام ساروانین شعرینی تقدیم ائدیر:
واخت وار ایدی، گؤز یاشی آزادلیق سیموولویدو:
واخت وار ایدی، یوخ ایدی قولون آغلاماغ حاقی.
نیسه... روحو شاد اولسون آلدیغیمیز جانلارین.
هئچ چوخو ایچیلمهدی آخیدیلان قانلارین...
ای بیزیم عصریمیزین گؤزللیک سالونلاری،
ساواشدا ژاننا دارکین ساچ دوزومو نئجیدی؟
بئیریین کؤینیینین واردی یویولماغ حاقی؟
دؤشونه دؤیمهدیلر قوررهلنهن ایگیدلر،
دؤیدولر قاراگؤزلو آتلارینین دؤشونه...
سورتولمکدن زای اولدو پیکاسسونون فیرچاسی
فضل اللاه نعیمینین اوتوز ایکی دیشینه.
دونیانی آنلاماقچون باخ او توپال تئیمورون
آخساق آیاقلارییلا محتشم یئریشینه.
و بو بویدا جان آتما نوازیشه، تومارا:
سیغال حاقی بویدادی بدنین شاللاغ حاقی.
گؤی اوزو ارشه قالخان عذابلارلا دولودو.
یئر کسیلیب آتیلمیش ازالارلا دولودو:
نیل چایینین سول قولو بابکین ساغ قولودو.
تؤکور کلئوپاترا اومید بورنونون سویون
لودوویکین اوزولموش داردانئل بوغازینا.
بو دونیانین گردیشی پیونئر شئیپورویلا
گؤر نه گؤزل زوی توتوب دده قورقود سازینا.
بس اوغلوم تورال هانی... قاضیلیق داغیندادی،
گون گلر ائنر اوردان قاضیلیک داغین توتار.
ساواشلارین معناسی: بو غصبکار وطنلر
اؤز اوغلون باسدیرماغا اؤزگه تورپاغین توتار.
و توتار بولاق گؤزون توتولموش تورپاغ حاقی.
او هانسی اؤلوم ایدی – قاپیسی آرخاسیندا
بیر کیشینی آتینین یهرینده گؤزلهدن؟
او هانسی چیلپاق ایدی – ناتمیز اللریله
مقدس یئرلرینی عاییب ساییب گیزلهدن؟
او تکگؤزلو انجیرین نئجولدو یارپاغ حاقی؟!
تاریخ
2020.03.30 / 11:52
|
مولف
Axar.az
|