کولت. آذ جعفر جبارلینین " دوشدو" آدلی شعیرینی تقدیم ائدیر:

گؤردوم اوزونو، باغچادا لاله‌م یادا دوشدو؛
امدیم دوداغین بال کیمی، آغزیم دادا دوشدو.

بیر لاله یئتیشمیشدی بو ویرانه چمن‌ده،
باد اسدی، خزان ووردو دا، لاله‌م بادا دوشدو.

بیر قؤنچه یئتیردیم، بزدیم، نازینی چکدیم؛
آلدی فلک الده‌ن اونو، یانین یادا دوشدو.

باغلاندی کؤنول بیر گوله، سس توتدو محلی؛
گویا کی، بو دونیادا قان اولدو، قادا دوش‌دو.

سؤز وئردی، سؤزون توتمادی، آند ایچدی، اونوت‌دو؛
بلکه، دئییرم، یار اوسانیب ایننادا دوش‌دو؟

بخت اوندا کی، پایلان‌دی، بیری چاتمادی پایه،
دونیادا او بدبخت ده بیزیم بربادا دوش‌دو.

بیر اووچو کیمی گؤل‌ده گؤزل بیر سونا ووردوم،
چال‌دی قانادین گؤی‌ده، گئدیب دریادا دوش‌دو.