کولت. آذ حبیب ساهیرین "لئیلا" آدلی حکایه‌سینی تقدیم ائدیر:

یایین ان گؤزل و آیدین گونلرین‌دن بیری ایدی. قرانقو چایینین دورو سولاری بولاق اوتونون ساچاقلارینی و عطیرلی یارپیزلاری یالایا-یالایا میانایا ساری آخیردی. قوشونون ایلخیلارینی یالنیز داغ اتکلرینده‌کی چمن‌لیکلرده دئییل، کندین مئشه‌لیکلرینده ده اوتلادیردیلار. نسیمین خفیف نفسی و گونشین حرارتیله یارپاق لانیب یاشیل اؤرتویه بورونن جوان آغاجلار بیر هفته ایچینده چیلپاق لاشاردیلار. کندلیلرین زحمتیله گؤیریب سونبوللشه‌ن زمیلر ده آتلارین آیاغی آلتیندا پایمال اولاردی. ایلخینی قورویان بیر سورو اس گرین باشچیسی سروان روتبه‌لی، یاراشیقلی بیر جوان ایدی. گؤزلریندن بیجلیک یاغیردی، ساغلام دیشلری پار-پار پاریلداییردی. بیلمیردین کی، گولور، یوخسا کؤپک کیمی دیش قیجیردیر. ایلخیچیلار کند اهالیسیله بیرلیکده اوبالاری دا بیر پارچا چؤره‌یه و بیر کاسا آیرانا محتاج قویموشدولار...
کندین تزه گلینلری و قیزلاری بولاغا گئدرکه‌ن مئشه‌نین قیراغیندان سوزوله-سوزوله کئچردیلر. چونکی عسگرلردن قورخوردولار. لاکین کندین گؤزه‌لی لیلا هئچ ده ایلخی آداملاریندان چکین‌مزدی. او، مغرور و جسارتلی ایدی. چیخیق یاناقلار، قیییق، جازیبه‌لی گؤزلر اونون تورکمه‌ن سیماسینا خصوصی گؤزل‌لیک گتیریردی. سروان اونا گؤز دیکمیشدی. ماراغادان گلن بیلر، اوباداکی جاوانلار، داغدا-داشدا قویون اوتارانلارین هامی‌سی بو بسته‌بوی گؤزه‌له عاشیق اولموشدو. لاکین لیلا یالنیز بیرینه کؤنول وئرمیشدی، آداخلان میشدی. آناسی پاییزی گؤزلییردی کی، قیزینی کؤچورسون.

قارانلیق گئجه‌لردن بیرین‌ده آت آیاقلارینین خوفولو تاپپیلتیلاری، کؤپکلرین هوروشمه‌سی، توکورپدیجی قادین هاواری بیری-بیرنه قاریشدی. هاوار تپه‌ن لیلانین دول آناسی ایدی.

او، چیغیرا-چیغیرا دئییردی:

– آماندی، قونشولار، ای آداملار، گلین، دادیما چاتین، گؤزو مون ایشیغی بیر دنه قیزیمی قاچیرتدیلار.

بوتون کند، آروادلی-کیشی‌لی، اوشاقلی-بؤیوکلو ائشییه آغناشیب داغ-داشی، چؤل-مئشه‌نی، چای-چمنی آختاردیلار، اوبالاری گزدیلر، اما لیلانی تاپمادیلار. گون چیرتلاییب داغلارین باشیندان بویلاناندا چینینده کوزه چایدان گلن قیزجیغاز جاماعاتا دئدی:

– لیلانی گؤردوم، چای قیراغین‌دا یئره سریلیب، سروان دا اونون یانین‌دا اوزانیب.

هامی قیز دئیه‌ن یئره آخیشدی. لیلانین رنگی گؤمگؤی گؤیر میشدی، گؤزلری قاپانمیشدی، اونو کیمسه بوغموشدو. سروانین آچیق قالمیش گؤزلری گؤیه زیللنمیشدی، باغرینا سانجیلمیش خنجرین یئریندن آخان قان موندیرینی ایسلاتمیشدی.