آنا صحیفه ادبیات |
۱۹۶۵-جی ایلده تئهراندا اردبیللی بیر عائلهده دونیایا گلیب. ۸ یاشیندا عائلهسی یئنیدن اردبیله قاییدیب. ایلک و اورتا تحصیلینی بورادا آلیب. ۱۹۷۹-جو ایل ایران ایسلام اینقیلابی دؤورونده یارانمیش اجتماعی-سیاسی دوروم اونون آلی تحصیل آلماسینا مانع اولوب. ۲۰۰۲-جی ایلده شاعره نئگین نوادرزی ایله عائله حیاتی قوروب. حاضردا تبریزده اؤزل بیر شیرکتده چالیشیر.
بیر نئچه شعیر کیتابی، "آیاقوستو خاطرهلر" رومانی و "یئلئنا" آدلی پویماسی، همچینین، تورکجهدن فارسجایا ترجمه کیتابلاری اردبیل و تبریزین فرقلی یاییم ائولرینده نشر اولونوب.
مکتوب
سارا، سلام!
ایندی کی آیریلیق الیفباسیدیر بارماقلارین
یاغیشلی بیر جومعهدن یازیرام
- و آشیقین جومعهسی یوخدور!-
سارا، نه وار؟
قورخون بودور آدین دویون دوشه
بیردن آدیما؟
یئل اولسام دا اؤزگه ایلییهجک سنی.
سارا، یئتیش!
خیالیندان دا گؤیچک گله بیلرسهن
و نه قدر آغلامیشام
کی، صاباحیم دا جومجولوق گؤرونور
- بؤیلهدیر منده سئوگی دورومو -
سارا، سوسوم؟
پاییز آخشامی کلمهلر ماهنا آختاریر
و سسلره خیرخیم سرینیب
نه دئییر لال یاغیشین بارماقلاری؟
نه ائدیم؟
سانکی ایپده قالان
کؤینییمده قالیب قوللاریم
نه ائدیم گلمیینه؟
سارا، چاغیر،
سارا، یئتیش،
یاغیشلی بیر جومعهدن یازیرام
دومانلی آدرئسیمی!
تبریزین یئللری
گئجه اسنده یئللری تبریزین
دوستلارین گئت-گلیندن امین اولورام
"و یئلین گتیردیی سسده
ایتمیجییمه ده..."*
گؤزلریم قارانلیغا اؤیرنممیش
قلهمی نردیوان کیمی ساخلاییرام،
نیققیلدایاراق چینینه چیخیرام
سؤزجوکلرین
حیرت آدلی توزلو باجادان گؤز قویورام:
...گئدیب-گلیر ده آیاققابیلاری،
یولداشلارین...!
هرکلریندن ارکین آسیلیدیر هله ده
یوز ایللیک آسیلمیشلاری، تبریزین،
علیم چاتمیر ائندیرم یولداشیمی، هله ده...
گئجه اسنده یئللری تبریزین
قورشونون سسینده بولورام بیریسینی.
گئجه اسنده یئللری تبریزین
دوسلارین گئت-گلیندن آه
امین اولورام...!
*بو میصراع نیگین نوادرزییه مخصوصدور.
تاریخ
2020.01.21 / 21:22
|
مولف
آینورا مممدووا
|