Axar.az
یوخاری
17 فئورال 2020


چیرکین قیز و قارا خوشبخت‌لیک – حکایه

آنا صحیفه ادبیات
12 Punto 14 Punto 16 Punto 18 Punto

کولت. آذ موشفیق شوکورلونون «چیرکین قیز و قارا خوشبخت‌لیک» حکایه‌سینی تقدیم ائدیر.

گؤزلری قاماشیر و گونشین یئرینی دقیقلش‌دیره بیلمیر. هه، بو باش گیجلله‌نمه‌سی‌دیر. اما تئز ده کئچیب گئدیر. هاوا او قدر ده ایستی دئییل، حتی سرین‌دیر، لاپ جننت‌دیر بورا. گونش ده سما کیمی آچیق‌دیر، بیر آز دا آغاریب، آچیق یومورتا ساری‌سی کیمی. گونش گؤیون اورتاسین‌دان اوفوقه ساری سوروشوب و اونا دقتله باخان‌دا - گؤزلرینی قیییب سمانین باغرینا ایشیق‌لی، سولوخموش لکه کیمی یاپیشان بالاجا کوره‌نین ایچین‌ده ایتیب-باتان‌دا، ائله بیل، یئرینی دییشیر؛ گاه آشاغی دوشور، گاه یوخاری قالخیر، سنله شیرین-شیرین اویناییر. باشی گیجل‌لنیر، دئیه‌سه‌ن. آرخاسی اوسته یئره سری‌لی اولماسا، یقین، گؤزلرینی گؤیه زیللمز. اونلاری باغلاییب، تئز ده آچیر. بو دفعه گونشین دایاندیغی، دوردوغو یئری مویینلشدیریب راهاتلاییر. گونش گول بوکئتینه بنزه‌یه‌ن بیر پارچا دولغون، قارا بولودون اوزرین‌ده سولوخوب دورور. قیزا باخیر. ائله بیل، سمایا قاریشیب. اما ایتمیر. قیز گؤز قاپاقلارینین آراسین‌دان بیر آز چتین‌لیکله ایزله‌مه‌یه چالیشسا دا (باشی گیجللنیر آخی)، گونش راحت- راحت سوزور، سارالیر، ایشیلداییر.

یوخ، بوگون او خسته‌لنیب. رنگی هئچ یاخشی گؤرونمور. قیزین دا باشی گیجل‌لنیر. چوخ گومان، رنگی ده سارالیب. قاشلارینی یوخاری چکیب کیرپیکلرینین آراسین‌دان محضون- محضون باخیر. اوریینین قورویوب یاپیخمیش دوداقلارینی گوجله بیر- بیرین‌دن قوپاردیب کؤکسونون آلتین‌داجا دانیشیر.

- گونشیم! منیم وفالی گونشیم! بو گون نیه بو قدر یورغون‌سان؟ اورییم تیترییر. منی ایسی‌ده‌جک بیر کلمه سؤز دئ.

گونشین دوز ختت کیمی ساریمتیل چیخینتیلاری اونون کیرپیکلرینین اوجون‌دا قیزی‌لی برق وورور. اما بو دا اوریینی ایسیتمیر. گونش دانیشماق ایستمیر. یئنه گؤیون هیس بولاشمیش بوزومتول بولودلارینا قاریشیب گؤزلرینی قیزین اوزون‌دن چکمه‌یه چالیشیر. یوخ. اونون گؤزلری یوخ‌دور آخی. بو، ایری، نهنگ، ساری بیر گؤز ببیی‌دیر.

- گونشیم، باخ چیرکینلشیرم گونو-گون‌دن. - اللرینی یامیاشیل یونجانین اوزرین‌ده گزدیره-گزدیره اونون کؤکلرینه، دیبلرینه توخونوب بارماقلارینی تورپاغا کئچیریر. بیر آز دا سویوقلوق هیسس ائتسین، گونش اونا آجی‌سین دئیه. – بیلیرسن. منیم اوزوم همیشه چیرکین اولوب. اوغلانلار باخماییب اوزومه. بیلیرسن، دانیشمیشام سنه. گؤرموسه‌ن همیشه. من گولومسمیشه‌م سنین کیمی، دقتله باخمیشام اونلارین گؤزلرینه. هئچ نه تاپماییبلار من‌ده. گؤزلریم‌ده معنالی هئچ نه تاپماییبلار، گونشیم. «ببکلرینین ایشیغی رنگ‌سیز اولسا دا، گوزگو کیمی تمیزدیر» – دئمی‌سه‌ن منه. هئچ کس گؤرمه‌ییب آخی بونلاری، هئچ کس خبردار دئییل. منیم بده‌نیم همیشه بیر دری، بیر سوموک اولوب، همیشه ده بئله آریق، تیفیل، چلیم‌سیز اولاجام. نه اله، نه بده‌نه، نه اور‌یه یاتمایاجام. هئچ کس ده باخمایاجاق منه، گونشیم. اوزوم اجایب، چیرکین اولاجاق همیشه. سئومه‌یه‌جکلر منی. باخ، بیرجه ساچلاریم سئویندیریر منی. قالین، قارا، اوزون ساچلاریم. اونلار ایشیلداییر آخی. اود یاغیر اونلاردان. قارا، ایشیق‌لی، ائهتیراس‌لی اود! بیرجه اونلار اورک اوینادا بیلر، ایسی‌ده بیلر کیمین‌سه کؤنلونو. اما ائهتیراسلا، وحشی‌لیکله باخان گؤزلر ده تاپا بیلمیرم. سئوگی‌دن اومی‌دی‌می اوزموشه‌م. آخی منیم یاشیم دا آز دئییل، ایگیرمی بئشی یئنی آدلامیشام. قوی لاپ افل اولسون، اما آتیل‌سین اوستومه، باخ ائله ایندیجه یئسین، پارچالاسین منی. خیالا باخ، منیم گونشیم. یورغونام، گؤرورسه‌ن؟ اورییم یورولوب آرتیق هر شئی‌دن. منی قیناییرسان، هه؟ نیه آخی؟ هئچ واخت سئوگی‌سیز هئچ نه ایستممیشه‌م، بیلیرسن. اما آرتیق ایچیم ده ائیبجرلشیب. آخی نئینیرم بو بده‌نی، نییمه لازیم‌دی؟! نه ائدیم اوریی‌می؟

گونش بولودالارین آراسین‌دا بیر بالاجا ایتیر. گیزلنیب چیخیر. سونرا یاواش-یاواش قیزاریر.

- دانیشماق ایستییرسن منله، هه؟ دئ گؤروم، قادینلار گؤزل اولان‌دا نئجه اولور، نئجه یاشاییرلار؟ اونلار دا سئویلمک ایستییر، بیلیرم. اما منیم کیمی یوخ. منیم کیمی یوخلوغا، هئچ‌لییه اومی‌دی قالمایان، خیالی چکیلیب گئدن قادین تاپا بیلرسه‌ن‌می، گونشیم؟ یورغونام، ساری ببییم. منیم کیمی عذاب چکه‌ن قادین تاپا بیلرسه‌ن‌می؟

یقین کی، باییلیر. قفیل‌دن باشی مؤهکه‌م‌دن گیجل‌لنیر. گونش ده، گؤی ده، یئر ده یئرینی دییشیر. اللری یاش تورپاغین ایچین‌ده یئره باسدیریلمیش قورو بوداق کیمی اییلیب قالیر. او، ایندی تامام باشقا یئرده‌دیر. هر شئی آغاپپاق‌دی. سونرا همین ایشیق‌لی، آغاپپاق هئچ‌لیگی ده کئچیب گئدیر...

ایندی، یقین کی، او خیال قورور. بونا یوخو دا دئمک اولار. او هاردادیر؟ بونو دئمک ایسه چتین‌دیر. هله کی اطرافین‌دا هئچ نه یوخ‌دور. بو چیرکین قیز نه قدر شیرینلشیب. اوزون‌ده بیر جیزگی ده دییشمه‌ییب: همین دیک، بیر آز دا دونقار بورون، تاریما چکیلمیش سئی‌رک قاشلار، اوزوم یارپاغینین آیاسی کیمی نازیک دوداقلار و اوزونون سومویونه یاپیشمیش دری‌سی. بو دری نئجه ده شیرینلشیب. ائله بیل، آیدینلانیب، اونلارا ایشیق گلیب. اوزون ساچلاری بئلینه یاسلانیب دورور و بیر آز دا دولغونلاشیب.

بودور، بیر مئشه گؤرونور. اونون ساچلاری کیمی قالین، ایستی مئشه. بو هان‌سی فسیل‌دیر؟ یقین کی، یاز دا دئییل. اما هر شئی قیزین گؤزلرین‌ده‌کی گوزگو تمیزلیینی آندیران ایشیق کیمی طراوت‌لی و ایفاده‌سیزدیر.

مئشه‌نین درینلیینه اوز توتوب گئدیر. اینین‌ده‌کی پالتار (بو، چهرایی دون دا اولا بیلر، آغ رنگ‌ده ایپک کؤینک و شالوار دا) ائله ده گؤزگلیم‌لی دئییل، اما هر شئی کیمی بو پالتار دا اورک اوخشایاجاق قدر شیرین‌دیر.

- ائی... گونشیم، هارداسان؟ ساری ببییم، من چاتمیشام، بوردایام.

آغاجلارین یارپاقلاری اونا توخونمور، اونلار نه قدر یوکسک‌ده‌دیر. یقین، اوچسا دا چاتا بیلمز بو آغاجلارا. و بودور، آچیق، گئنیش بیر دوزه‌ن‌لییه چیخیر. گونش آپایدین گؤرونور. هر یئر ساپساری اوتدور. کناردا، لاپ تپه‌یه چاتاچات‌دا قوروموش، پالچیق گؤل وار. قیزین مئشه‌لیک‌دن چیخدیغی طرف‌ده ایسه آچیق دوزه‌نین اورتاسینا ساریمتیل-یاشیل یونجا گؤمگؤی گؤیریر. همین یئرده آلچاق، بالاجا، کؤورک بیر آغاج قانادلارینی آچیب سمایا یوکسلجکمیش کیمی دورور. یارپاقلاری، بوداقلاری ائنلی و دولغون‌دور.

قفیل یالین، کهر آت آغاجین دیبین‌ده بورنونو یئره دیره‌ییب فینخیریر.

- گونشیم، چاتمیشام. هارداسان؟ باخ گلمیشه‌م. ائییی... ساری ببییم، بوردایام!

قیز وار گوجویله باغیریر. سسی گؤلو ده، دیک، ائنلی تپه‌نی ده آدلاییب کئچیر. اونا ائله گلیر کی، ساری چمنلیین ایچینه آتیل‌سا، بیردفه‌لیک یوخا چیخار، اوزوب سونسوزلوغا قوووشار. قیز یئریدیکجه اوت قورشاغینا قدر گلیب چاتیر. باشقا نه جور دوشونه بیلر کی!

گونش آخیر کی دیل‌لنیر.

- بوردایام. گؤلون یانینا گل.

بو سس، ائله بیل، قویونون دیبین‌دن چیخیر. اما گؤی ده، یئر ده دانیشیر بو واخت و «بوردایام» سؤزو اوتلارین اوزریله آددیملایان قوت‌لی کولیی ائهتیراسلا قاباردیر. آت بیر ده فینخیریر. بو دفعه ایری، گؤزل باشی سمایا باخیر.

قیز، سانکی، اوچور، قانادلانیب اوچور. سئوینج اوزونو بورویور. گؤزلری سو کیمی دورولور. ایندی، باخان دئیر، ببکری قاپقارادیر و گونش اونلاری اوخشاییب اؤپور. اطرافا لاپ اوزاق‌دان دا سئچیله‌ن قریبه پاریلتی یاییلیر. کولک ایسه ساچلارین‌دا اویناییر، نفه‌سینی دریب قیزین یاتیم‌لی بئلی و قشنگ چیینلری ایله ساچلاری آراسین‌دا زریف بوشلوق یارادیر. قیز آغاجا یاناشیر. و او گئتدیکجه آت دا ترپنیر. کهر آت گؤله دوغرو گئدیر. قیز شیلتاق بدنیله آغاجی سلاملاییب آتین آرخاسینجا قاچیر. سئوینج، خوشبخت‌لیک اوزون‌دن نیه چکیلمیر، گؤره‌سه‌ن؟ اونون ساچلاری آتین بوینون‌دا قانادلانان قارا خوشبخت‌لیک کیمی کولیین عکسینه دوغرو هاوادا اوچوشور و ائله درین‌لییه، بوشلوغا ساری قاچیر کی، اونلاری گؤرمه‌مک مومکون دئییل...

لیل‌لی، پالچیق‌لی گؤلون کنارین‌دا سوکوت ساچان آغاپپاق بیر آت گؤرونوردو.

تاریخ
2020.01.22 / 12:11
مولف
آیتاج آراز
شرح لر
دیگر خبرلر

طنز بویوک آغا افندی - حکایه

من صوفیلر یولداشییام... - شاه ایسماییل

کاش سن ده اوشیئیدین بئله مخلوق کیمی... - میرزه علی

آنا، نیسگیل ائدیرم من سنه ساچلار آغاریب...

کاسا دوشدو طاقچادان، داغیلمیشدی ائو ائشیک... - اوشاق ادبیاتی

تبریزین کؤکسونه اولدوزلار تاخسام- شعیر

تبریزین جیلدینه گیریر مشروطه چاغیم - شعیر

قلبیم‌دن وورولموشام، یارالییام، ایستانبول - شعر

ایپک ساچلارینی بیر واخت اوخشایان- شعیر

شم‌سی تبریزی آفوریزملری

خبر خطّی
 
Axar.az'da reklam Bağla
Reklam
Bize yazin Bağla