کولت. آذ مدینه گولگونون "آزاد قیز" شعیرینی تقدیم ائدیر:

منی نه بورانلار بوغدو، نه ده سئللر آپارمادی

قارا کولک اسدیسه ده، بوداغیم‌دان قوپارمادی.

شاهید اولوب تاریخ منه، دردلی قلبیم نه چکیبدیر.

خوش گونلره حسرت گؤزوم هر آن قان‌لی یاش تؤکوبدور.

گنج یاشیم‌دان چوخ ناله‌لر ائتمیشم من بولبول کیمی

آچیلمادان آز قالمیشام خزل اولوم بیر گول کیمی.

وطن عشقی چوخ آتیب‌دیر منی هر ظلمون اوجاغینا

هر آن حسرتله باخمیشام آنا وطن قوجاغینا.

لاکین منیم مغرور باشیم اییلمه‌ییب‌دیر ظالمه

وطن آزادلیغی اوچون حاضر اولموشام اؤلومه.

اینتظارلا گؤزلمیشه‌م اورییم‌ده‌کی دویغونو

اوشاق‌لیق‌دان اینان کی، من اولموشام وطن وورغونو.

آزاد قوشلار کیمی اوچوب ایستمیشم قاناد چالام

دوغما دیار چیچک‌لنه، من ده باخیب ایلهام آلام.

آه، نه بؤیوک سعادت‌دیر، چاتدیم من ده اؤز آرزوما

بوتون خالقی شاد گؤروره‌م هر باخیش‌دا ساغ-سولوما.

گؤزلریمه اینانمیرام، حقیقت‌دیر یا یوخودور

وطنیمین آزاد سسی اوچان قوشلاری اوخودور.

حاقیم واردیر، بو گون دئییم، من اولدوم بیر آزاد قیز

نه دردیم وار منیم آرتیق، نه ده کی قالمیشام یالقیز.

ایندی منه ایلهام وئره‌ن بیر مقدس وطنیم وار

آزاد دیلیم، آزاد قلم، گول چیچکلی چمه‌نیم وار.

بیر شوری‌ده بولبول کیمی آزاد اولموشام قفس‌دن

اورییمه شادلیق قونور آزاد ائلده‌ن گلن سس‌دن.

بو سس منه ایفتیخاردیر، هم حیات‌دیر، هم سعادت

آزاد یازیب دؤوران سورمک چوخ‌دان اولموش منه عادت.

آزاد قیزام، آدیم گولگون، سئوینجلریم گلمز سانا

گونش آدلی رهبریم وار، وطن آدلی بیر مرد آنا.