آنا صحیفه ادبیات |
کولت. آذ هکایهسئورلر اوچون "دوشدو" حکایهسینی تقدیم ائدیر:
ائوده داریخمیشدی؛ چیخیب قاپیسینین آغزیندا اوتوروب گلیب گئدنلره باخیردی.
بیرییله ایکی کلمه آلیب وئرسهیدی، اورهیی آچیلاردی. آمما هئچ کیم دایانمیردی، ائلهبیل هامی بیر یئره تلهسیردی ...
کوچهدن توولو کئچن بیر اوغلانی دایاندیرماق ایستهدی، اوجادان دئدی:
- دوشدو.
اوغلان دایانیب اورا بورا باخدی. سونرا قوجا کیشییه ساری باخیب بیر ده یان یؤرهیه گؤزونو دولاندیردی.
قوجا کیشی اوغلانین چاشیب قالدیغینی گوُرنده دئدیگینه پشمان اولدو.
اوغلان جیبلرین بیر ایکی دؤنه یوخلادی، باشینداکی بؤرکونه ده الین سورتدو، فیکره گئتدی، قوجا کیشییه ساری باخدی. بو نه دئییر؟ نه دوشدو؟ گئدیب کیشیدن سوروشماق ایستهدی؛ گئتمهدی. "نه دوشهجک؟! هئچ زاد". دوزلدی یولا.
گونلر کئچدی. قوجا کیشی اؤلدو ...
اوغلانین دا جوانلیغی اؤلدو.
داریخیردی؛ کوچهده اوتورموشدو. بیر اوغلان کوچهدن یئیین سوووشوردو. اوغلانا باخاراق بیردن چیغیردی:
- دوشدو...
تاریخ
2020.05.18 / 11:33
|
مولف
Axar.az
|