کولت. آز اوشاق ادبیاتی سئرییاسین‌دان "سئحیرلی نجره" آدلی ناغیلı تقدیم ائدیر:

یازار : پدرو پابلو ساکریستان

چئویرن:سمیه سلوکی

بیر زامانلار‍‍‍، خسته بیر اوشاق یاشاردی. او، خسته اولدوغونا گؤره عؤمور بویو یاتاق‌دا قالماق مجبوری‌یتینده ایدی. او تر‍‌پنمه‌یه؛ ‌بیر یئره گئدیب-گلمه‌یه قادر دئییلدی. تای-توشلارینا اونا یاخین‌ دورماغا ایذین وئریلمیردی. اوغلان چوخ اذیّت چکیردی. گون‌لری غم-کدرله اؤتوشوردو. اونون پنجره‌دن ائشییه باخماقدان باشقا بیر ایش گؤرمه‌یه امکانی یوخ ایدی! او، گوندن-گونه اؤز اومودونو اودوزوردو. گون‌لرین بیر گونونده پنجره‌دن غریبه بیر شئی گؤردو. او غریبه شئی سوسیس دورمه‌یی یئین بیر قوش ایدی. قوش آچیق پنجره‌دن ایچری گیریب، اوغلانا «آخشامین خئیر اولسون!» دئییب، دؤنوب گئتدی. اوشاق بونو گؤرندن سونرا گؤردویونو اینانماغا چالیشیردی کی، بیردن پنجره‌نین کناریندا قویوق پوفله‌ین بیر میمون گؤردو. اوغلان اوّل اؤزوندن بو ایشین نئجه اولا بیله‌جه‌یینی سوروشدو. سونرا داها چوخ گولونج سیمالار پنجره‌دن گؤروندو. او گولمکدن اووونوردو. اونو گولمک‌دن ساخلاماق چتین‌ایدی. دومبک چالان میمون، دؤشه‌یین اوستونه آتیلیب-دوشن بیر فیل، گؤزلوک تاخیب سیاستدن دانیشان بیر ایت، بونلاری گؤرن آدام گولمه‌یه بیلمزدی؟! بالاجا اوشاق بو حاقدا کیمسه‌یه بیر سؤز دئمه‌دی. اونون بو سؤزلرینی کیم ایناناجاقدی؟ بونا باخمیاراق، بو غریبه سیمالار بالاجا اوغلانین روحونا و جیسمینه سئوینج گتیریردی. زمان اؤتدوکجه اوغلانین خسته‌لیی آزالیب، دورومو یاخشیلاشیردی. او، آرتیق مکتبه گئری دؤندو. مکتب دوستلاری‌یلا قونوشوب-دانیشارکن، گؤردویو بوتون غریبه شئی‌لری اونلارا دانیشدی. او، اَن یاخشی دوستو ایله صحبت ائدرکن دوستونون مکتب چانتاسیندان چیخان بیر شئی گؤردو. اوغلان، یولداشیندان بونون نه اولدوغونو سوروشدو. یولداشی نهایت کی، چانتاسیندا نه اولدوغونو گؤسترمک‌دن قاچا بیلمه‌دی. اورادا، چانتانین ایچینده، اوغلان، ان یاخشی دوستو خسته اوغلانی سئویندیرمک اوچون فایدالاندیغی بوتون گئییم‌لر و ماسکالاری گؤستردی. او گوندن بری بالاجا اوغلان هر زمان باشقالاری‌نین کدرلنمه و تک‌لیی حیس ائتمه‌مسی اوچون الیندن گله‌نی ائدیردی.