آنا صحیفه ادبیات |
کولت. آذ دومان بختیارینین شعیرینی تقدیم ائدیر:
دیلیمیز دوستاق اولاندان آنام آغلار قالدی
دوداغیندا داغیلان قیرمیزی داغ لار قالدی
باغا قار دوشدو گولون قول بوداغی قوورولدو
پاییز اوغروندا سینان یاسلی بوداقلار قالدی
گونشین باغری یاریلدی قاراقان قایتاردی
یادداشیندا یازیغین ساپ ساری چاغلار قالدی
دیلی باغلی، الی باغلی، آیاغی قانداللی
آنا لار یاندی کول اولدو ،لال اوشاقلار قالدی
اوخولون هنده ورینده یازیمیز دوغراندی
فیکریمیز دوندو قیفیللاندی ، دوداقلار قالدی
کچمهگه چرچیوه سیندن آنامین یول سالدیق
چؤکولوب توپراغا باغلاندی آیاقلار قالدی
ساری گول قارغیشا توش گلدی بیزیم باغلاردا
هامی شنلیکده بیزیم قاپ باجا باغلار قالدی
دومانین دردی دئشیلدی قایالار سسلندی
تیتره دی سؤز چاناغی سیندی، چاناقلار قالدی
سیناغا چکدی ائلین دیل دنیزیندن کئچدی
اونون آردیندا سولان یاشلی یاناقلار قالدی
تاریخ
2020.02.20 / 23:16
|
مولف
آینورا مممدووا
|