کولت. آذ اوستاد کاتیبوغلونون "گئتدی" آدلی شعیرینی تقدیم ائدیر:

آغلایان گؤزومه بیر باخمادی یار.
باشین آلیب بیلمم هایانه گئتدی
آیریلیق دمینده هیجران گونونده
فریادیم فغانیم هر یانا گئتدی.

گئدیشی یقین اولدو دونوشو گومان.
قالدیم داغلار کیمی باشیمدا دومان.
سحریم قار اولدو آخشامیم بوران.
منی اسیر ائتدی هیجرانا گئتدی .

ائویم چؤللر اولدو مسکنیم داغلار .
قاره تئلین یئرین توتوبدو آغلار .
گونوم آخشام اولدو قارالدی چاغلار.
جاوان عؤمروم نئجه زیانا گئتدی .

کاتیب اوغلو هانسی گئدن دؤنوبدو ؟
حسرت یاخان هانسی آتش سؤنوبدو؟
کؤنلومون باغینا بایقوش قونوبدو
بولبول اوچوب باشقا گولشانا گئتدی.