کولت. آز سولدوز دَییرمانچی اوغلونون " تورکون دیلی" آدلی شئیرینی تقدیم ائدیر:

تورکون دیلی لهجه دییل
شئر خوروزدور جوجه دییل
بو سؤز یانلیز. منجه دییل
بو بئیتینی دونیا دئییر

قایدالی دیر هم درین دیر
صنعتین دیر ؛ هونرین دیر
شکردیر ،بالدان شیرین دیر
شربتینی. دونیا دئییر

میلیون میلیون مثلی وار
تاریخ بویو گؤزه‌لی وار
بیر داغ کیمین هئیکلی وار
قامتینی دونیا دئییر

تاپدالانیر گونده مین یول
تاپداق آتدا آچیر مین قول
بلا لری باشیندان بول
قئیرتینی. دونیا دئییر

اؤزگه دن سؤز اوغورلامام
بانکیم واردی پایلارام وام
گؤر نه ائدیب بابک آتام
جورعتینی. دونیا دئییر

آذربایجان دییل جاندیر
جاندان آرتیق دیر جاناندیر
الحق کیشی ستارخاندیر
هیمتینی دونیا دئییر

آشیقلیق بیر باش هونردی
دده قورقورد بیر رهبردی/اؤندردی
ائللرینه یول گؤستردی
عززتینی دونیا دئییر

گلین گئدَک بیر موغانا
سالام وئرک خان چوبانا
جان قوربان آذربایجانا
توربتینی دونیا دئییر
(آپاردی سئللر هایانا ؟؟؟
بئیعتینی. دونیا دئییر)

ائللریم وئرسین اَل اَله
ماراقلانسین آنا دیله
دؤنسونلر شیدا بولبوله
میللتینی دونیا دئییر

اوخونسون تورکو هر یئرده
حاق اوستوندن دوشسون پرده
بوگون نَچون دوشوب درده
عللتینی. دونیا دئییر

وار اولسون 《 سولدوزون》 ائلی
آتمادی بو آنا دیلی
اینسانلیغا چوخدور مئیلی
نییتینی دونیا دئییر

بو دیلده آددان فعل اولار
جیناسلاریندا تئل اولار
شیهه چکر بیر سئل اولار
قیر آتینی دونیا دئییر

بئش یوزدن چوخ سازیمدا وار
هر هاواسی اورک آچار
باشینا ایگیدلر ییغار
صؤحبتینی دونیا دئییر

بو دیل نسیمی بسله ییب
همیشه حاققی سسله ییب
گر حلبده یوکسله ییب
شوهرتینی دونیا دئییر

هانی فضولی تک حاق سؤز
غزل مئیدانیندا. توخ گؤز
بوگون وارسا دیلینده کؤز
صنعتینی دونیا دئییر