کولت. آذ شاعر رفایل تاغیزادنین کوروناویروس پاندمییاسی ایله باغلی یازدیغی «قارا کابوس» شعرینی تقدیم ائدیر:

بو نه مصیبت‌دی، بو نه فلاکت؟

هامی اؤز ایچین‌ده، اؤز یاتاغین‌دا،

هامی وار-گل ائدیر اؤز اوتاغین‌دا.

باشیمیز اوستون‌ده بیر قارا کابوس.

قورخودان اینسانین بده‌نی بومبوز.

گلن بد خبردن، هر سرت خبردن

ایچینی واهیمه باسیر آدامین.

محله، کوچه‌لر، شهرلر بومبوش،

بوشلوغون ایچین‌ده بوغولور آدام،

یادام بو حیاتا، تامام من یادام.

قویمادیق اوولکی حالین‌دا قالا،

قویمادیق ساکیتجه بیر نفس آلا.

هر یئرده اوچقونلار، هر یئرده قارت...

بیزی باغیشلارمی گؤره‌ن طبیعت؟

اللر گؤروشلرین حسرتین‌ده‌دی،

اوزلر اؤپوشلره تامارزی قالیب،

باخیش پنجره‌یه دییب قایی‌دیر...

هاوا دا تزه‌دن قیشا کؤکلنیب.

اوشویور آغاجین آغ چیچکلری.

داها یارپاقلارا توخونماق اولمور،

داها بنؤوشه‌نی قوخلاماق اولمور...

گؤره‌ن باغیشلارمی بیزی طبیعت؟

گؤره‌ن باغیشلارمی بیزی نهایت؟