کولت. آذ گونئی آذربایجان‌دان اولان نرگیز صادیقوندین "یئنه بیر قادین جسدی" حکایه‌سینی تقدیم ائدیر.

هر سحر سیقار قوخولو ساچلاریم‌دان اورییم بولاناراق اویانیرام و چارپایی‌دان آسیلان آیاقلاریما باخیب سون سیقارین آجی‌سینی پارکئتین اوزرینه هایخیریب،گوزگوده قادینلیغیما توپوروره‌م.

آغزیمین آجی‌سینی آلیب یئنه بیر سیقار آلیش‌دیریرام. هر سحر دیزلری‌می قوجاقلاییب، کؤپوک و کول قاریشیغینین اوزمه‌سین آغ موزایکلرین اوزرین‌ده سئیر ائدیره‌م. بوخارلی دیوارلار دقتی‌می چکیر و من سون دفعه اوتاغیمین دیوارلارینی اوچورماق اوچون جیب تئلئفونومو اونلارا ساری تولازلادیغی‌می خاتیرلاییرام. آنجاق دیوارلارین یئرینه تئلئفونوم اوچموش‌دو. ایسته‌مک کیفایت ائتمیر. من یالقیزلیغیملا تانیش اولوب، سسسیزلییمه قوووشموشدوم. سئوینیردیم. نه یاخشی دیوارلار واردیر، یوخ‌سا یالقیزلیغیم دا منی آتمیش‌دی.

اریم باشقا قادینین گؤزلری اؤنون‌ده باشیما باغیراراق یوروجو اولدوغومو سؤیله‌ییب منی ترک ائتدی. اوزون زامان‌دیر بیرلیک‌ده بیر شئیلر یئمه‌یه چیخمیردیق. او گونو زنگ آچیب خواهیش ائلدیم، بیر آز زامان آییرسین. او، آغزینی سوروندورسه ده قبول ائتدی. اؤنجه‌دن هئچ گئتمدییم بیر کافئنین آدرئ‌سینی آنلاتدی. داوا-دالاشیمیز اورادان باشلادی. ماسانین اوزرین‌ده دوداق بویاسینا بولاشمیش بیر کاغیذ دسمال گؤردوم. و او گون اوندان یالنیز دوروست اولماغینی ایستدیم.

او، بیزیم سول طرفیمیزده اوتوران قادینا تئز-تئز باخیب وورغونو اولدوغوم گؤزلرینی قیسیب داها دا شیرین اولوردو. بو حال‌دا اوندان ایستدیم همه‌ن قادینا یاخینلاشیب سئودیینی سویله‌سین. آنجاق او، منه یانیلیرسان دئدی. من‌سه، اریمه باخیب سویوققان‌لی‌لیقلا:

- هیسس ائلییرم، او قادین‌دان سنین خوشون گلیر. فیکیر وئر، لچیینین دوشمیینه لاقئیددیر! او، سنه باخیب ساچلارینین اوجون اوینادیر. یقین سن ده اونون ساجلارینین بویاسینی سئویرسن و بئینین‌دن اونلاری اوخشاماق کئچیر - دئدیک‌دن سونرا او، اؤزون‌دن چیخ‌دی، سونرا حیرسلنیب دئدی:

- اولدوقجا دؤزولمز اولوب‌سان!

من بیر داها توختاق شکیل‌ده دئدیم:

- بو سؤزلری گئت او گؤزلرینه گیردیین خانیما دئنه‌ن.

اریم غضبله منه باخیب آیاغا قالخ‌دی، اؤنجه منی، سونرا کافه‌نی ترک ائتدی. سوسدوم. سونرا کؤنول‌سوزجه اریمین دیرناقاراسی مشوقه‌سینه باخیب اونونلا گؤز-گؤزه گلدیم. آنجاق او، اوزونو چئویریب اؤنون‌ده‌کی سویوق قهوه‌یه شکر علاوه ائتمکله مشغول اولدو.

- تأثیری یوخ‌دور - دئییب گئدیب یانین‌دا اوتوردوم. او، درحال ساچلارینی توپلاییب لچیین ساهمانلادی.

- نیی نظرده توتورسوز، خانیم؟

دیرسکلریمی ماسایا دیره‌ییب، اللریمی چنه‌مین آلتینا قویدوم. اوزونه باخیب گولومسدیم، سونرا گؤزومله قهوه‌یه ایشاره ائلدیم:

- قهوه‌ن سویوق‌دو، شکر اریمز! ایسته‌مک کیفایت ائتمیر.

قادین دسماللا دوداغینین ترین سیل‌دی. اونا «منیم اریم‌دن خوشون گلیر؟» دئدیم. ال-آیاغینی ایتیردی:

- واا، خانیم، سیز نه دانیشیرسیز؟ منیم گؤروشوم وار بوردا. سئوگیلیم بئش-اون دقیقه‌یه گلمه‌لی‌دیر.

دئدیم، اوندا بس نیه بایاق‌دان منیم اریمه ازیلیردین؟ سئوگیلینی سئومیرسن‌سه آیریل. اونو سئوگینه اینان‌دیریرسان، اما باشقا کیشیلره ساچلارینی اوینادیرسان.

من هیرس‌لی دئییلدیم، چوخ آرام سسله، اونون گؤزلرینه باخاراق دانیشیردیم. اونون‌سا گؤزلری کلله‌سینه چیخمیش‌دی. آرتیق سؤزلریمه دؤزه بیلمه‌دی، چانتاسییلا تئلئفونونو ماسانین اوزرین‌دن گؤتوروب دولومسوناراق "تانری باغیشلاماسین سنی" دئییب دوداغینین ترینی آلدیغی دسمالی گؤزونه ساری آپاریب قیوراقجا پیللکه‌نلری ائندی.

کئچیب اوتوردوم او قادینین یئرین‌ده، اریمین اوتوردوغو یئره باخدیم. ساچلاری‌می او قادینین ساچلاری کیمی اورتادان آییریب اوزومه تؤکدوم. لچیی‌می آرخایا چکیب یاخا دویمه‌لریمین بیرینی آچدیم.

یوخاری قالخان قارسون منی باشاچیق گؤرجک گؤزونو من‌دن آلدی. دؤنوب، اریمله اوتوردوغوموز ماسایا یاخینلاشیب اریمیش دون‌دورمالاری الین‌ده‌کی سینییه قوی‌دو. گئتمک ایستدیک‌ده "زحمت اولماسا، اوتورون" دئدیم. باخمادی.

- جاوان اوغلان سیزه بیر سوالیم وار.

بو آن گؤزلریمه زیلله‌ن‌دی. باشینی آشاغی سالیب اوتوردو. قارسون هارداسا ایگیرمی یاشین‌دا اورتابوی، ساریشین بیر اوغلان ایدی.

- منه باخین، من سیزین دقتینیزی جلب ائدیره‌م؟

قیزاران کیمی اولدو. آیاغا قالخیب گئتمک ایستدیک‌ده دایاندیردیم:

- اوتورون - دئدیم - منه سیزین کمکینیز لازیم‌دیر. جاواب وئرین لطفاً.

اوغلان اودقونوب "بلی" دئدی، سونرا درحال سینینی گؤتوروب گئنمک ایسترکه‌ن دایان‌دی: "من او قادینی گؤردوم، ائله ده جازیبه‌لی دئییل‌دی، منجه، اوزولمیینه دیمز" دئییب ائندی.

ایین-باشی‌می راهلاییب آشاغی دوشدوم. حسابی اؤددیک‌دن سونرا گنج قارسونا تشککورومو بیل‌دیرمک اوچون اونون دایاندیغی یئره طرف گئتدیم. او یئرکؤکلرینی بؤیوک بیر قابا بوشالدیرکه‌ن ایش یولداشینا دئییردی:

- بو گئجه نئجه یاتاجام، بیلمیرم، اونلاری ان آزی هفته‌ده بیر یول بوردا گؤروروک...

ایتی آددیملارلا کافئ‌دن چیخیب ساچلاری‌می او قادینین ساچلاری رنگه بویاتدیرماغی دوشونوردوم. من اودوزدوم.

حقیقتین نه اولدوغونا وارمیش کیمی.

فیکریم آیدینلان‌دی، اؤلومه آددیملاییرمیش کیمی.

دوشونوب، تاپیب، بیله‌رک‌دن اونوتموش کیمی.

اودوزدوم.

سیقار ساتان او عمییه وئردییم سؤزو سیندیرمیش کیمی.

اودوزدوم.

نئچه گیله سیقار آلدیغیم خاطریم‌ده دئییل. تاکسییه مینیب "باشقا موسافیر مین‌دیرمه" دئییب ائویمین آدرئسینی وئردیم. من او گونو سون دفعه کوچه‌ده‌کی قادینلارلا سالاملاشیب اونلارا گولومسدیم، سون دفعه چانتام‌دان آچاری گؤتوروب ائوه کئچدیم.