آنا صحیفه ادبیات |
کولت. آز محمد کاوسینین "حاج حسنقولی کاوسینین باداملیق سووارماسی" آدلی حکایهسینی تقدیم ائدیر:
حاج حسنقولونون «دیلمان باغی» آدلی بیر باداملیغی وار ایدی. بو باداملیغا حاج خلیل اوغلی حاج علی آدلی بیر شریکی واریدی .
قدیم زمانلار قیش فصلینه بیر آی قالمش باداملیقلاری چای سویویلا سوواراردیلار. بیر گون حاج حسنقولی حاج علی ایله بیرلیکده باداملیغی سوارماغا گئدیرلر، سویون آز گلمهیینه گؤره گئجه ده اوردا قالمالییدیلار. حاج حسنقولی اؤز - اؤزونه فیکیرلشیر کی، من گئجه سو سووارا بیلمه رم، اونا گؤره آخشاما بیر آز قالاندا حاج علیدن بیر آز آیریلیب، خانا باغا طرف گئدیب، بیردن اوجا بیر هارای چکیر .
- ای وای حاج علی گل ائویم یئخیلدی !
حاج علی ساده، صفالی و دوز چوخ دا مهریبان بیر کیشییدی. او، تئز اونون یانینا قاچیب، نیگران حالدا سوروشور
- نه اولدی حاجی؟!
- ای وای ائویم ییخیلدی منی ایلان چالدی! اوزون ائله قارالدیر کی، حاج علی اینانیب، تئز بیر نفر تاپیب حاج حسنقولونی ائششهیه میندیریب، ائولرینه یولا سالیب، دئییر:
- حاجی قوخما من تکلیقدا باداملیغی سووارارام، سن گئت دؤکتوره.
حاج حسنقولی ائولرینه یئتیشنده بوتون طایفایا سس دوشور کی، حاج حسنقولونو ایلان چالیب. هامی اونون دؤورهسینه ییغیشیرلار.
حاج حسنقولونون بیر کلبه محمد حسین آدلی بیلیجی عمیسی وار ایدی، او دا چوخ نیگران اوزون یئتیریر، اما اونون اوزونده هیچ ایلان چالما آثاری گؤرمور. هامینی کنارا چکیب یاواشجا سوروشور:
- حاج حسنقولی سنی هاردا ایلان چالیب؟
- عمی دیلمان باغیندا.
-بالا دیلمان باغینین هانکی طرفینده؟
-عمی خانا باغ طرفینده.
-اهووو قورخما! من خانا باغ طرفینده بیر بؤیوک قره اغ عرب گؤرموشدوم، حتمن سنی او چالیبدی.
- عمی بلکه ده.
- بالا خانا باغین هانکی طرفینده چالیب؟
- عمی گون چیخان طرفینده.
- اهووو بالا قورخما! گون چیخان طرفینده من یئکه بیر بووه (رطیل) گؤرموشدوم حتمن سنی او چالیب.
- عمی بلکه ده.
- قارداش اوغلی خانا باغین گون چیخان طرفینین حاج عبدالاه طرفینده یوخسا باداملیق طرفینده؟
- عمی حاج عبدالاه طرفینده.
- اهووو! من حاج عبدالاه طرفینده نئچه دانا آتلی قاریشقا گؤرموشدوم حتمآ سنی اونلار سنین آیاقیوی دیشلهییبلر؟
- عمی جان بلکه ده.
- اوغلوم حاج عبدالاه طرفینده بیر اوت کولی واریدی، سنی اوردا دیشلهمیبلر؟
- هن عمی جان اوردایدی.
- قورخما بالا! اوردا بیر بالاجا یئر جیریلمیشدی، حتمن سنی یئر دیشلییب؟
بو دفعه حاج حسنقولونی گولماق توتور:
-اولا بیلر عمی جان!
کلبه محمد حسین عمی یاواشجا اییلیب اونون قولاغینا دئییر:
- قارداش اوغلی! سو سووارماقدان اکیلیبسن ها دئمه بیلمهدیلر!
- هن عمی جان، سسیوی چیخارتما نئجه دئییرسن او جوردی!
بو آندا حاج حسنقولونون ننهسی آغلایا- آغلایا ائوه گیریب هارای چکیر:
- ائویم ییخیلیب، بالامی ایلان چالیب!
کلبه محمد حسین عمی تئز اونون چادیراسیندان توتوب، بو طرفه چکیب دئییر:
- آی زن عمی! من زورولان ایلان چالماغی یئر دیشلهماغا یئتیرمیشم، هارا بیر ده قووزورسان ایلان چالماغا؟! قورخما حاج حسنقولی صاباح آیاغا دوراجاق!
بئلهلیکله حاج حسنقولی راحات ائولرینده یاتیر، حاج علی ده سحره کیمی سو سوواریر!
تاریخ
2020.05.27 / 22:00
|
مولف
Axar.az
|