کولت .آذ شعریلر سیل‌سیله‌سین‌دن نؤوبتی شعرینی تقدیم ائدیر:

سونرا دا کی، بیلیرسن..سونرالاری اولمور هئچ،
نه عؤمورون،
نه گونون، نه ده گؤزله‌مکلرین.

اما کی، سن هر گئجه خیالینین کونجون‌ده
نه واختسا گولومسه‌یه‌ن اومودلار بؤیودورسه‌ن.

هئچ اؤزون ده بیلمه‌دن،
اؤزون ده آنلامادان-
اومودلارین یئرینه بولودلار بؤیودورسه‌ن.

بؤیودورسه‌ن بئله‌جه هسرتی، آیری‌لیغی...

گؤزلرینین کؤکون‌ده لیل‌لنیر خاطره‌لر،
گؤل‌لنیر خاطره‌لر...
گؤزله‌مکلر او قدر،
او قدر اوزون چکیر...

صبرینین اورتاسینا اونودولموش بیچاق تک
میل‌لنیر خاطره‌لر.
خاطره‌لر میل چکیر گؤزونون ایشیغینا،
یاواش-یاواش گؤزلرین ایشیق‌دان دوشوب گئدیر.
بیرجه قاشیق قان ایمیش،
حیاتین دا،
اؤمرون ده...

سون نفسین قان کیمی قاشیق‌دان دوشوب گئدیر.
سونرا دا کی، بیلیرسن سونرالاری اولمور هئچ..
نه تالعین،
نه بختین..نه ده آلین یازینین.
پنجره‌نین آغزین‌دا هسرتینی چکیرسن،
هارداسا سن‌سیز قالان عؤمرون اوشاق یازینین
بیلیرسن گلمه‌یه‌جک، قاپینی دؤیمه‌یه‌جک...

سنی سسله‌مه‌یه‌جک،
او اوشاق‌لیق،
او گونلر..
او گونلرده سئودیین او هاوالار،
او کسلر،
او ناغیللار،
او یوللار...

بیر ده نلر، ائهههه...نلر.
و بئله‌جه، بئله‌جه.
لاپ هر گوندوز،
هر گئجه.

نه واخت‌سا بؤیوتدویون بولودلارین آغلاییر.
بولودلارا قوشولوب،
خاطره‌نین کونجون‌ده
تا بؤیویه بیلمه‌یه‌ن اومودلارین آغلاییر.

گؤزلییرسن بیر عؤمور،
گؤزلدیین عؤمورون سونرالاری گلمیر هئچ..
سونرا دا کی، تااااااااا سونرا
بیلیرسن،
سونرانین دا سونرالاری اولمور هئچ.