Kult.az شاعر-ائسئیست روان جاویدین "دوه‌لر، آتلار، شارلار..." حکایه‌سینی تقدیم ائدیر:
دوه‌لر قویویا آتیلیردی، توپلار سبده دوشن کیمی. قویونون آغزی پالچیق‌لی اولدوغون‌دان بعضیلرینین آیاقلاری سوروشور، دوشونمه‌یه ماجال تاپا بیلمیردیلر. سویون اوزرینه آغیر داش کیمی چیرپیلیر، سس‌سیز-سمیرسیز یوخا چیخیردیلار.
کاروان‌داکی سونونجو دوه‌نین نه آیاغی سوروشدو، نه ده اؤزونو جوردانین علین‌ده‌کی توپ کیمی هیسس ائتدی. چؤمبلیب دوستلارینین آرخاسینجا خئیلی باخدی، باخدی. قفیل هؤنکورتوسوندن کنارداکی داغداغان آغاجلارینین بوداقلاری سیلکه‌له‌ن‌دی، یارپاقلارین‌دان قاریشقالار یاغدی. اوجسوز-بوجاق‌سیز چؤلون تنهالیغی دوه‌نین بوینون‌دا یوک ایدی؛ او، یا دیگرلری کیمی بو قویویا آتیلاجاق، یا دا چؤلون کیمسه‌سیزلیینی دولدوراجاقدی. او ایسه اؤلمیی سئچدی و باشینی قویونون کنارین‌داکی داشا چیرپیب اینتیهار ائتدی.
فرهاد بدلبیلی «شرف» اوردنی ایله تلطیف ائدیلدی
شاعر بابوللا سلیموو وفات ائتدی
انتونی هوپکینس ۴۷ ایللیک تجروبه‌سینی بؤلوشدو
***
اونا یالان دانیشماغی من اؤیرتدیم، ایلک یالانی دا منه دانیشدی. موروودان دوه کاروانینین دوشدویونو دئدی. بیر آنلیق بورالاردا آرتیق افغانلارین یاشامادیغینی، قاراباغ محاربه‌سین‌دن سونرا کؤچوب گئتدیکلرینی، کاروانلارینی دا اؤزلری ایله کئچمیشه چئویردیکلرینی اونودوب آرخایا چؤندوم. هئچ نه یوخ ایدی. گولنده هله ده کؤرپه اولدوغونو آنلادیم و اؤزومه سؤز وئردیم کی، بیر ده اونو سیگارت آلماغا گؤندرمه‌یه‌جه‌یه‌م. هر دفعه "کمل"دن بیرینی ده اونا اوزادار، چکمه‌سی اوچون اسرار ائدردیم. گئجه‌لر آناسینین دانلادیغینی ائشیدیب وجدان عذابی چکمک عادتیم اولموشدو. ساروان بیزیم محله‌نین ان بالاجا ساکینی ایدی. اوندان سونرا قادینلار حامیله قالمادی. آناسی زولیخا بلوکدان بئش-اون آددیم قاباقدا قوتاب بیشیریب ساتار، آتاسی یوسف موبایل نمره‌لرین سیفاریشینی آلاردی. قاپیسینا "نار، جین، سیم نمره‌لر ساتیلیر" یازیلمیش بودکادا هم ده تلفنلارین تعمیری ایله مشغول اولان جوان اوغلان ایشلییردی. گونلرین بیرینده اوغلانی ماشین ووردو، یئرینده‌جه کئچیندی. حیات ایسه داوام ائده بیلیردی اونسوز.
ساروانا شمس‌له مولانانین دوستلوغونو دانیشیردیم تئز-تئز. فیکیر وئریردیم کی، دینله‌یه‌ن‌ده گؤزلری یول چکیر، ائله بیل کیمیسه گؤزلییردی. دفعه‌لرله شمسین نئجه غیب اولدوغونو سوروشموشدو، آخیرینجی گؤروشوموزدن ساوایی هئچ واخت اونا بو باره‌ده دانیشمامیشدیم.
آوگوستون یئددینجی گونو ساروان بی‌کیف یانیما اوتوردو. سیگارئت ایسته‌دی. من ده وئردیم. همیشکی کیمی پشمان اولاجاغیمی بیله-بیله وئردیم. شمسین نئجه غیب اولدوغو باره‌ده بیرجه دفعه سوروشدو. کیفینی بیر آز دا پوزماییم دئیه دانیشدیم. بورا یازیب اونو یئنی‌دن اینجیتمک ایستمیرم. سیگارئتی یئره آتیب اوزاقلاشدی.
شر قاریشاندا محله‌میزین قویوسونون باشینا بوتون محله اهلی ییغیلمیشدی. زولیخایلا یوسف دیز چؤکوب قویونون زیل قارانلیق دیبینه باخیردی، ساناردین، سجدددیرلر. ساروان اؤزونو قویویا آتمیشدی، اما سویون اوزونده ائلجه اوتورموشدو، باتمیردی، آداملار دا اونو گؤروب هیکل کیمی دونموشدولار. آتاسینین سواللارینا جواب وئرمیردی، ائله بیلیردیلر، ائشیتمیر. باشیمی اییب قیشقیردیم:
"نیه قویویا دوشدون، نه گزیرسن اورادا؟"
قویونون دیبینده‌کی قارالتینین سسینی بیرجه من ائشیتمیشدیم:
"رومینی گؤزلییرم..."
***
ایلخی‌داکی آتلاردان بیری کیشنه‌ییب آیاغینی قویونون یانین‌داکی قوجا داغداغان آغاجینا ووردو. آغاجین یارپاقلارین‌دان قاریشقالار یاغدی. آت ساکیتلشه بیلمیردی، قویودا نه ایسه گؤرموشدو، قورخوب آغاجا طرف قاچمیش‌دی. کناردا سریله‌ن دوه‌نی ایسه یاتمیش بیلیب یاخینلاشمیردیلار. ایلخی یاواش-یاواش اوزاقلاشیر، داغداغان آغاجینی آیاقلاری ایله دؤیجله‌یه‌ن آت ایسه اؤز آنلاشیلمازلیغینی داوام ائتدیریردی؛ رمه‌نین یورغون گؤزلرینه گاه گؤرونور، گاه دا یوخا چیخیردی.
***
ساروانین قویویا دوشوب رومینی گؤزله‌مه‌یه باشلادیغی گوندن ایکی ایل، ایکی آی، ایگیرمی سککیز گون کئچیردی. رومینین نینکی سارواندان، هئچ قویودان دا خبری یوخ ایدی. او، اؤز ایتمیش کاروانینی آختاریردی. قوزبل آتی تئز-تئز یورولور، تؤوشییر، رومینی بئلیندن سالیردی. تانری آتی دوه‌می یاراتماق ایستمیشدی؟ دوداقلاری، بئلی، قویروغو دوه‌لرده‌کی کیمی، آیاقلاری، گؤزلری، سسی ایسه آتلارداکی کیمی ایدی. گونلر کئچیر، نه رومی گلیب بیزیم محله‌یه چیخیردی، نه ده رومینین کاروانی تاپیلیردی. اوشاقلار زولیخانین قوتابلارینی یئدیکجه یازیق قادینین گؤزلری دولور، حسرتله قویویا طرف چئوریلیردی. ساروان ایسه هئچ نه یئمه‌دن، ایچمه‌دن او مظلوم قارانلیق‌داجا تالع دوستونو گؤزلییردی.
آتلار کندیمیزده ماشین سورمه‌یه باشلایاندا هئچ کیم تعجبله‌نمه‌دی. اوللر بئله شئیلر اولموشدو. جاماعات بو غریبلیین فرقینه یوسیفین یانین‌دا ایشله‌یه‌ن گنجین قزایا دوشدویو گون واردی. آتلاردان بیری اونو وورموشدو. باشی داشا دییب بوینو قیریلمیشدی. آت زار-زار آغلاییردی، آنجاق هئچ کیم اونا محل قویمور، هامی گنجین ناکام حیاتینا اوزولوردو. بو حادثه‌دن سونرا آتلار کندیمیزدن کؤچ ائتدی. یای سحری اویانیب گؤردوک کی، بیر دنه ده آت قالماییب، تؤوله‌دن قاچیبلار.
پاییزا دوغرو هاوالار سرینلییر، آرادا کولکلر داغداغان آغاجلارینی یئللییردی. محله‌میزه تزه کؤچه‌ن عائله‌نین بالاجا قیزی هر گون شار آلیب دولدورار، سونرا اطرافی مفتیلله حاسارلانمیش قویونون یانینا گلیب اوینایاردی. بونو بیرجه من ایزلییردیم، چونکی حکایه‌نین نئجه بیتدیینی بیرجه من بیلیردیم.
یوسیفین بودکاسی آرتیق ایشله‌میردی. زولیخا دا آرتیق قوتاب بیشیرمک ایسته‌میردی. عائله‌نین بیرجه اوغلو قویودا قالمیشدی، ساغ ایدی، سسینی ائشیدیردیلر، اؤزونو ده قارآلتی کیمی سئویردیلر. نئچه دفعه جهد ائتدیلر چیخارتماغا، آلینمادی. ساروان گؤزلرینی بیر نقطه‌یه دویونله‌ییب بیرجه جمله‌نی تکرارلاییردی.
"رومینی گؤزلییرم..."
***
ساری شار ماوینین قولاغینا پیچیلدادی:
"اوچا بیلرسن؟"
ماوی شار قیزجیغازین الین‌دن سیریلیب هاوایا قالخدی، آغاجین بوداغینا توخونوب پارتلادی.
***
کندین بوتون قوجالاری اؤلدو، بوتون جوانلاری قوجا اولدو، اوشاقلار بؤیودو، سارواندان سونرا اوشاق دوغولمادیغی اوچون کندین سونونجو نسلی کدر ایچین‌ده قیوریلیردی. گونش آز-آز گلیر بورالارا، آغاجلار قورویوب الده‌ن دوشوردو.
رومی کاروانینداکی سونونجو دوه‌نین بده‌نینی تاپاندا آغلایا بیلممیش، قوزبئل آتینی کنارداکی آغاجین گؤوده‌سینه باغلاییب غیب اولموشدو.
من ده کؤچمه‌یه حاضیرلاشیردیم. کنددن جانینی قورتارانلارین اؤولادی دا اولوردو، خوشبخت حیاتی دا.
یاسمن، قویونون هندورینده شار اوینادان قیز دا بؤیویوب گؤزللشمیشدی. اللرینده‌کی شارلاری پاپکالار، چینین‌ده‌کی آشیرمانی چانتا عوض ائتمیشدی. آرتیق هامی کیمی اونون دا عائله‌سی کنددن کؤچوردو. ائولر بوشالمیشدی. بو کنددن بیرینجی آتلار، سونرا شارلار، ایندی ده آداملار گئتمیشدی. چامادانی ییغیب حیطه چیخدیم. یوسیفله زولیخا اوغوللارینی قویودا قویوب ترک ائتمیشدیلر. سونونجو دفعه قویویا باخدیم. قارالتی یوخ ایدی. آدینی قیشقیردیم. بیر سس ائشیتمدیم. قویودان قیرمیزی رنگده شار گؤزومون اؤنوندن هاوایا یاواش-یاواش قالخیردی. سونرا بوداقلارین آراسیندا چؤپه کئچیب پارتلادی.
