Kult.az بالاجالار اوچون "اوجاق ایلانی" ناغیلینی تقدیم ائدیر:

بئله دئییرلر کی، بیر کندده بیر کیشی وارمیش. بو کیشینین داخماسینین اطرافی باغ-باغات ایمیش. کیشی همیشه تئزدن دوروب باغ-باغاتلا مشغول اولارمیش. بیر سحر عادتی اوزره یئنه ده باغا چیخیر. هاوا دا یاواش-یاواش ایستیلشمه‌یه باشلاییر. کیشی گؤرور کی، بیر بؤیوک ایلان داشین اوزرینده قیوریلیب اؤزونو گونه وئریر. ایستییر اؤلدورسون، ایلان فیشیلتییلا داشلارین آراسین‌دا گؤرونمز اولور.

کیشی بو احوالاتی قوجا آداملارا دانیشیر. اونا مصلحت ائدیرلر کی، ایلانا توخونماسین. او، اوجاق ایلانی‌دیر. یوردون برکتی‌دیر. اونو اینجیدیب ائلسه، کوسوب گئدر، یوردون برکتینی ده اؤزو ایله آپارار. اگر اؤلدورسه، بؤیوک بلا اوز وئرر. چونکی اونلار یئددی قارداش اولورلار. هارادا اولسالار، گلیب اؤز قارداشلارینین انتقامینی آلارلار.

کیشی قوجالارین سؤزونه عمل ائتمیر. سحر دوروب ایلانی گودمه‌یه باشلاییر. گون قیزاندا ایلان یئنه ده داشین اوستونه قالخیب قیوریلیب، اؤزونو گونه وئریر. کیشی فورصتی وئرمه‌ییب بیر داش گؤتوروب ایلانا آتیر. آنجاق داش ایلانا دیمیر. ایلان سسه اویانیب دیم‌دیک قالخیر، غضبلی-غضبلی فیشیلداماغا، دیلینی چیخارتماغا باشلاییر. سونرا دا ساکیتلشیب اؤز یئرینده اوزانیر. کیشی بیر داش دا آتیر. بو دا ایلانی توتمور. ایلان بیردن یئریندن سیچراییر. سورونوب اورادان اوزاقلاشیر.

بو احوالاتدان خیلی کئچیر. کیشی هر سحر گیزلنیب ایلانی گودسه ده، اوندان اثر-علامت گؤرمور. بئله-بئله گونلر بیر-بیرینی عوض ائلییر. کیشینین باغ-باغاتی تمام قورویور، تئز-تئز بدبخت حادثه باش وئریر. کیشی باشا دوشور کی، ناحاق قوجالارین سؤزونه باخماییب، اوجاق ایلانینی کوسدورموشدور. اونا گؤره ده اونا بدبختلیک اوز وئریر.